Elimizde qus eti óndirisiniń kólemi artty

NUR-SULTAN. QazAqparat – Qus fermalarynda salqyndatylǵan qus etiniń óndirisi jylyna 26 paıyzǵa, al qatyrylǵan et óndirisi – 9 paıyzǵa ósti. Budan bólek, sektordaǵy ımport ta belsendi joǵarlaýda. Bul týraly QazAqparat tilshisi energyprom.kz saıtyna silteme jasap habarlaıdy.

2020 jyldyń qańtar-shilde aılarynda jańa soıylǵan nemese salqyndatylǵan qus etiniń óndirisi 60,5 tonnaǵa ósti. Bul ótken jylmen salystyrǵanda birden 26,2 paıyzǵa joǵary. Qatyrylǵan qus etiniń óndirisi de ósti – 8,9 paıyz (66,5 myń tonnaǵa deıin).

Aq et óndirisiniń eń kóp kólemi Almaty, Aqmola jáne Shyǵys Qazaqstan oblystarynda shyǵarylady. Munda Almaty oblysyndaǵy «Kazros-Broıler» AQ, Aqmola oblysyndaǵy «Makınka qus fabrıkasy» JShS jáne Shyǵys Qazaqstan oblysyndaǵy «Aıtas-MP» JShS (eki kásiporyn «Aıtas» kompanııalar tobyna kiredi), Aqmola oblysyndaǵy «Capital Projects LTD» JShS («Shańyraq» BK» JShS enshiles kompanııasy) jáne taǵy basqalary jumys isteıdi.

«Makınka qus fabrıkasy» aǵymdaǵy jyldyń sońyna deıin óndiristik qýattylyǵyn jylyna 25 myńnan 50 myńǵa deıin ósiredi, dep habarlaıdy QR Aýylsharýashyq mınıstrliginen. Import almastyrý boıynsha mindetterdi iske asyrý aıasynda Qazaqstanda 2020 jyly 8 et fabrıkasy paıdalanýǵa engiziledi. Birinshi jartyjyldyqta eki qus fabrıkasy – «Shymkent qus» JShS (Túrkistan oblysy) jáne «QazAgros» kesheni (Qostanaı oblysy) iske qosylǵan. Qalǵan alty fabrıka jyldyń sońyna deıin jumys isteı bastaıdy.