Elimizde Qurlyq áskerleriniń brıgadalyq taktıkalyq oqý-jattyǵýlary bastaldy

Oǵan Aeroutqyr áskerleri men «Ońtústik» óńirlik qolbasshylyǵy áskerleriniń qolbasshylary basshylyq jasaıdy, dep habarlady Qorǵanys mınıstrliginiń baspasóz qyzmetinen.

Vedomstvonyń atap ótýinshe, ótkizilip otyrǵan brıgadalyq-taktıkalyq jattyǵýlarda Qurlyq áskerleriniń desanttyq-shabýyldaýshy, mehanıkalandyrylǵan jáne artıllerııalyq brıgadalary naqty jaýyngerlik atystardy pysyqtamaq. Bul jattyǵýǵa 3500-den astam áskerı qyzmetshi, 650-den astam jaýyngerlik jáne arnaıy tehnıka tartylǵan. Mundaı kólemdegi oqý-jattyǵýlar qysqy jaǵdaıda tuńǵysh ret ótkizilýimen erekshelenedi.

«Jattyǵýlar Taldyqorǵannan bastaldy. Aeroutqyr áskerleri men «Ońtústik» óńirlik qolbasshylyǵy áskerleriniń quramalary men bólimderi jaýyngerlik ázirlikke tartylyp, jeke quram der kezinde oqý-jattyǵý ótkiziletin aýdandarǵa shoǵyrlandy. Áskerlerdi qaıta toptaý 1000 shaqyrymnan astam qashyqtyqtarǵa jasalyp, marsh aralastyrylǵan tásildermen ótkiziledi. Bul tehnıka óz jolymen, áýe jáne temirjol kóligimen júredi degen sóz. Jattyǵýlardyń sheshýshi kezeńi aqpan aıynyń basynda Qurlyq áskerleriniń «Mátibulaq» polıgonynda ótetin bolady», - delingen vedomstvo aqparatynda.

Oqý-jattyǵýlar ótkiziletin aýdandarǵa tyldyq, tehnıkalyq jáne medıtsınalyq qamtamasyz etý oryndary jaıǵastyryldy. Marshtan keıin oqý-jattyǵýlarǵa qatysýshylar naqty jaýyngerlik is-áreketterge daıarlyqty bastaıdy. Odan keıin brıgada quramynda qarsy shabýyl men jaýyngerlik atysty qoldaný arqyly qorǵaný urystary ótkiziletin jaýyngerlik maqsattaǵy mekenge shyǵady. Jattyǵýlardyń jospary lańkes toptardy, olardyń bazalaryn, qoımalaryn joıý, sondaı-aq áskerlerdi jan-jaqty qamtamasyz etý barysynda qorǵanýdy uıymdastyrýdy, áskerlerdi basqarýdy qamtıdy.

Mınıstrliktiń aqparatyna qaraǵanda, oqý-jattyǵýlardy ótkizý kezinde jaýyngerlik tártipke, atys júıesine, aımaqty durys qoldaný qabiletine, atys, soqqy men manevrlerdi saýatty úılestirýge úlken kóńil bólinedi.