Elimizde kún saıyn 1 myńnan astam sábı dúnıege keledi

ASTANA. QazAqparat - Qazaqstanda Táýelsizdik jyldary dıagnostıkalaý men náresteniń boıyndaǵy patologııalardy erte kezeńde anyqtaýdyń zamanaýı tásilderin qoldaný nátıjesinde sábı ólimi 1991 jyly 1000 tiri týylǵandarǵa shaqqanda 27,4-ten 2015 jyly 9,39-ke deıin, ıaǵnı 3 esege tómendedi.

Bul týraly QR Densaýlyq saqaý jáne áleýmettik damý mınıstrliginen habarlandy.

«Respýblıkada kún saıyn 1 myńnan astam, jyl saıyn 400 myńnan asa sábı dúnıege keledi. Týý kórsetkishi sońǵy 5 jylda 3 paıyzǵa ósti. Elimizde sábı ólimin azaıtýǵa baǵyttalǵan sharalardyń nátıjesinde salmaǵy 500 gramm jáne odan asatyn shala týǵan balalar ómir súrýge múmkindik aldy. 5 jylda salmaǵy 1500 gramǵa deıingi sanattaǵy balalardyń tirshilikke qabilettiligi 30 paıyzǵa ósip, 60 paıyzǵa jýyq kórsetkishti qurap otyr»,-delingen vedomstvo málimetinde.

Elimizdiń barlyq óńirlerinde tıimdi perınataldy kómekti engizý boıynsha oqytý ortalyqtary jumys isteýde. Perınataldy kómek kórsetýde biregeı tásilderdi qoldanýdy qamtamasyz etý maqsatynda 300-den astam emhanalyq hattamalar halyqaralyq standarttarǵa sáıkestendirilip, bekitildi, sonymen birge medıtsınalyq qyzmetkerler oqytylyp, medıtsınalyq JOO-da oqý jáne jumys baǵdarlamalary ózgertildi.