Elimizde KSRO tólqujatymen júrgen 867 adam anyqtaldy

NUR-SULTAN. QazAqparat – Bıyl 8 aıda elimizde burynǵy KSRO tólqujatymen júrgen 867 adam anyqtaldy. Bul týraly QR ІІM Іshki ister mınıstrligi Kóshi-qon qyzmeti komıtetiniń bastyǵy, polıtsııa polkovnıgi Sabyrjan Seıtjanov aıtty, dep habarlaıdy QazAqparat tilshisi.

«Elimizdiń ár jerinde qujatsyz turyp jatqan adamdar anyqtalyp jatyr. Osyǵan oraı mınıstrimizdiń tikeleı tapsyrmasymen bıyl arnaıy aktsııa uıymdastyryp jatyrmyz. Statıstıkaǵa kóz salar bolsaq, 2019 jyly «qyzyl tólqujatpen» (KSRO tólqujaty) júrgen 1 727 adam qujattandyryldy. Bıyl 8 aıda 867 adam anyqtalyp, jańa qujatyn aldy», - dedi komıtet bastyǵy ІІM-niń Facebook paraqshasynda ótken brıfıng barysynda.

Mysaly onyń aıtýynsha, Qostanaı oblysynda bir er adam 30 jyl boıy qujatsyz turǵan. Ony ishki ister organdarynyń qyzmetkerleri anyqtap, tıisti kómek bergen.

«Qazirgi ýaqytta ol jeke kýáligin aldy. Taǵy bir mysalǵa toqtalsam, Qaraǵandy oblysynda 46 jastaǵy áıel men onyń uly uzaq ýaqyt boıy jeke basyn kýálandyratyn qujatsyz ómir súrgen. Búginde bizdiń qyzmetkerler tıisti suraý hattaryn joldap, olardyń qaı jerde týǵanyn, turǵanyn anyqtap jatyr. Al Almaty oblysynda kóshi-qon qyzmeti qyzmetkerleri óńirde turatyn úsh qart adamǵa alǵash ret jekebastaryn kýálandyratyn qujattaryn beredi. Onyń biriniń óz azamatymyz ekendigin anyqtap jeke kýálik bersek, ekinshisine azamattyǵy joq kýáligin tabystady. Al úshinshi qart adam Reseı azamaty bolyp shyqty. Oǵan yqtııarhat rásimdedik», - dedi Sabyrjan Seıitjanov.