Elimizde Qojaly oqıǵasyna arnalǵan shara ótkizildi (FOTO)

ASTANA. QazAqparat - Búgin Túrki akademııasy halyqaralyq uıymy Ázerbaıjannyń Qazaqstandaǵy Elshiligimen birlesip Táýelsizdiktiń 25 jyldyǵyna oraı Qojaly oqıǵasyna arnalǵan shara ótkizdi, dep habarlaıdy akademııanyń baspasóz qyzmeti.

Basqosýǵa Ázerbaıjannyń Qazaqstandaǵy Tótenshe jáne Ókiletti Elshisi Rashad Mamedov, Ázerbaıjan ulttyq-mádenı uıym basshylary men dıaspora ókilderi jáne birqatar elderdiń elshileri men dıplomatııalyq korpýs ókilderi, kórnekti túrkitanýshy ǵalymdar men qoǵam qaıratkerleri qatysty.

Jıyndy ashyp, júrgizgen Túrki akademııasynyń basshysy Darhan Qydyráli qatysýshylardy Táýelsizdiktiń 25 jyldyǵymen quttyqtap, baýyrlas eki el arasyndaǵy tarıhı-mádenı baılanystardyń mańyzdylyǵyna toqtaldy.

Óz kezeginde Ázerbaıjan elshisi Rashad Mamedov Ázerbaıjannyń táýelsizdikke jetý jolyna qysqasha sholý jasap, tarıhı Qojaly oqıǵasy jaıly baıandady, sondaı-aq egemendiktiń asyl murattaryn sóz etti. Sondaı-aq, elshi Qazaqstan Respýblıkasynyń prezıdenti Nursultan Nazarbaevtyń І Naýryzdy Alǵys aıtý kúni dep jarııalaýyna oraı, zulmat jyldary Ázerbaıjannan kelgen qandastardy baýyryna basqan qazaq halqyna alǵys aıtty.

Kezdesý barysynda qatysýshylar Túrki álemindegi yqpaldastyq pen yntymaqtastyq máselelerin tóńireginde pikir almasty.

Sonymen qatar, shara aıasynda xocali.kz saıty tanystyrylyp, ázerbaıjan kınematografısteri túsingen derekti fılm kórsetildi.