Elimizde qosymsha tórt órt sóndirý deposy salynyp jatyr - TJM
ASTANA. 13 mamyr. QazAqparat - Ótken úsh jylda elimizde alty órt sóndirý deposy iske qosyldy. Qazirgi tańda Astana, Almaty, Jańaózen, Taraz qalalarynda qosymsha tórt depo salynýda.
Bul týraly búgin QR Parlamenti Májilisinde tótenshe jaǵdaılar qyzmetiniń qorytyndylaryna arnalǵan Úkimet saǵatynda málim boldy.
Tótenshe jaǵdaılar mınıstri Vladımır Bojkonyń aıtýynsha, ótken jyly 85 birlik órt sóndirý jáne avarııalyq-qutqarý tehnıkasy, 1194 birlik avarııalyq-qutqarý jáne órtten qutqarý jabdyǵy satyp alynǵan. Nátıjesinde 2011 jylmen salystyrǵanda Tótenshe jaǵdaılar mınıstrligindegi avtokólik jáne arnaıy tehnıkamen jaraqtandyrý 5,9 paıyzǵa, jabdyqpen jaraqtandyrý 9,6 paıyzǵa ósken. Toqtala ketetin jaıt, mınıstrdiń málimetine qaraǵanda, satyp alynǵan órt sóndirý jabdyqtarynyń 60 paıyzǵa jýyǵy qazaqstandyq naryqtyń ónimderi bolyp tabylady.
«Órt qaýipsizdigi qaǵıdasy men normalaryn saqtaýǵa qatysty óndiristik jáne áleýmettik mádenı maqsattaǵy 77887 nysan tekserildi. Órt qaýipsizdigi normalary men qaǵıdalaryn buzǵany úshin 37396 laýazymdy tulǵaǵa aıyppul salyndy. Aýdanaralyq ekonomıkalyq sottarǵa nysandar qyzmetin toqtatý úshin 3341 talap aryz berildi», deıdi V. Bojko. Onyń aıtýynsha, byltyrdan beri ónerkásiptik qaýipsizdik talaptaryn buzǵany úshin 6220 nysan men 6 kásiporynnyń jumysy toqtatyldy. 120 mln. teńgeden astam soma kóleminde 3231 kásiporyn basshysyna aıyppul salyndy.
