Elimizde qosymsha 30 myńdaı adamǵa joǵary bilim alý múmkindigi berildi
ASTANA. QazAqparat - 19-24 qańtar aralyǵynda elimizdegi joǵary oqý oryndarynda byltyr oqýǵa shartty túrde qabyldanǵan stýdentter keshendi testileýden ótti. Bul týraly QR BǴM baspasóz qyzmeti habarlady.
«2016 jyly talapkerlerge qıynshylyqtar týdyryp kelgen moraldyq-psıhologııalyq problemalar qataryn joıyp, joǵary bilim alý múmkindigin aıtarlyqtaı jeńildetetin sharalardyń engizilgeni kópshilikke belgili. Byltyr jazda ótkizilgen UBT nemese KT nátıjeleri boıynsha eń tómengi shekti deńgeıdi baǵyndyra almaǵan talapkerler alǵash ret testterdi qaıta tapsyrý múmkindigin aldy. Nátıjesinde 12 myńǵa jýyq talapker joǵary oqý oryndaryna túsken bolatyn.
Sonymen qatar, qaıta ótkizilgen testileý qorytyndylary boıynsha da tómengi shekti ball jınaı almaǵan talapkerler JOO-na birinshi semestr aıaqtalǵansha, shartty túrde qabyldanǵan. 19-24 qańtar aralyǵynda ótken keshendi testileýdi atalǵan sanatqa jatqyzylatyn stýdentter tapsyryp, olardyń 5 myńnan astamy JOO-da bilim alýdy jalǵastyrý múmkindigin aldy.
Sondaı-aq, shet elderde oqyp, qazaqstandyq joǵary oqý oryndaryna aýysýǵa yqylas bildirgen 12,5 myńnan astam stýdent keshendi testileýdi sátti tapsyrǵan.
Osylaısha, ústimizdegi oqý jylynda qosymsha 30 myńǵa jýyq adam elimizdiń joǵary oqý ornynda bilim alýǵa múmkindik aldy. Bul nátıje elimizdegi joǵary bilimi bar azamattar úlesin arttyrý jónindegi strategııalyq mindettermen janasady. Mysaly, bilim alýǵa birdeı múmkindik týǵyzý Ekonomıkalyq yntymaqtastyq jáne damý uıymyna (EYDU) kiretin memleketterdiń basymdyqtary qatarynda. Bilim alý múmkindikteri joǵary elderdiń alǵashqy bestigine Shvetsııa, Fınlıandııa, Nıderlandy, Belgııa (Flamand aımaǵy) jáne Irlandııa syndy memleketter kiredi.
Osylaısha, Qazaqstanda keń beıindi mamandar úlesiniń artýy arqyly joǵary bilimdi ult qalyptastyrýǵa baǵyttalǵan sharalar álemdik úrdisterge saı keledi. Joǵary bilimi bar adamdar jańa jumys oryndaryn ashýǵa bastamashylyq jasap, qajettilik týyndaǵan jaǵdaıda qysqa merzimde qaıta oqytyla alady. Al, JOO-dar úshin bul naryqtyń qajettilikterine barynsha sáıkes mamandardy daıyndaý mindetterin iske asyrý múmkindigi. Basqasha aıtqanda, halyqtyń joǵary bilim alý múmkindigin keńeıtýdiń ekonomıkalyq jáne áleýmettik nátıjeleri qoǵamnyń damýy men jeke azamattardyń ál-aýqattaryn jaqsartýǵa oń yqpal etpek.
