Elimizde koronavırýstyń aldyn alýǵa baılanysty qabyldanǵan sheshim qashan ózgeredi

NUR-SULTAN. QazAqparat - Elimizde koronavırýs taralý qaýpine baılanysty qabyldanǵan sheshim qashan ózgeretini belgisiz.

Bul týraly Ortalyq kommýnıkatsııalar qyzmeti alańynda ótken koronavırýstyq ınfektsııanyń aldyn alý sharalaryna baılanysty ótken baspasóz konferentsııasynda QR Densaýlyq saqtaý mınıstri Eljan Birtanov aıtty, dep habarlaıdy QazAqparat tilshisi.

«Bul sheshim elimizdiń bas sanıtarlyq dárigeriniń qaýlysy boıynsha jasaldy. Epıdemıologııalyq jaǵdaıdyń qalaı bolatynyna baılanysty taǵy qosymsha sheshim qabyldanatyn bolady. Ázirge bul sheshimniń ózgerý ýaqyty anyqtalmaǵan. Epıdemıologııalyq qaýip seıilgenshe ol da ózgermeıdi»,- deıdi Eljan Birtanov.

Eske sala ketsek, búgin Memleket basshysy Qasym-Jomart Toqaev koronavırýs pandemııasyna baılanysty Qazaqstanda qoǵamdyq is-sharalardyń toqtatylatynyn jarııa etti.