Elimizde koronavırýstan jazylǵandar sany kún sanap artyp keledi - Aıjan Esmaǵambetova

NUR-SULTAN. QazAqparat - Búginde koronavırýstan emdelgender sany 2074-ke jetti. Bul týraly QR bas memlekettik sanıtar dárigeri Aıjan Esmaǵambetova QR Densaýlyq saqtaý mınıstrliginiń medıa ortalyǵynda ótken tikeleı efırde aıtty, dep habarlaıdy QazAqparat tilshisi.

«Búginde koronavırýstan emdelgender sany 2074-ke jetti. Keshe ǵana 130 adam emdelip shyqty. Búgin 15 adam emdelip shyǵady dep josparlanýda», - deıdi QR Bas memlekettik sanıtar dárigeri Aıjan Esmaǵambetova.

Onyń aıtýynsha, sońǵy birneshe kúnde emdelgender sany kún saıyn aýyryp tirkelgender sanynan kóp.

«Bul - óte jaqsy kórsetkish, demek koronavırýs ınfektsııasy boıynsha jaǵdaı turaqtalyp keledi degen sóz. Bul - elimizde engizilgen tótenshe jaǵdaı rejıminiń nátıjesi. Naýryz aıynda aýyrǵandar sanynyń ósýi 150%-dy kórsetse, sońǵy táýlikterde aýrýdyń ósý kórsetkishi 2,3%-dy ǵana kórsetýde. Bir apta ishinde bul kórsetkish 5%-dan aspady. Tótenshe jaǵdaı rejıminiń aıaqtalýy karantın sharalary túgel toqtaıdy degendi bildirmeıdi. Karantın rejımin saqtaý kerek, biraq elimizdegi epıdemıologııalyq jaǵdaıǵa baılanysty birtindep jumsaryp otyrady», - deıdi ol.