Elimizde koronavırýs juqtyrǵan 16 adam aýyr halde jatyr

NUR-SULTAN. QazAqparat – Qazaqstannyń memlekettik bas sanıtarlyq dárigeri Aıjan Esmaǵambetova elimizde koronavırýs juqtyrǵandar týraly aıtty, dep habarlaıdy QazAqparat tilshisi.

«Álemde koronavırýs juqtyrǵandardyń sany 1 mıllıon 270 myńnan asyp ketti. Onyń 70 myńy ólimmen aıaqtaldy. Qazaqstanda 604 jaǵdaı tirkeldi. Barlyq jaǵdaı boıynsha 122 jaǵdaı syrttan juqtyrǵandar, 350-den astamy – qarym-qatynas (otbasylyq jáne ujymdyq) arqyly juqtyrǵandar», - dedi Aıjan Esmaǵambetova OKQ-da ótken baspasóz máslıhatynda.

Memlekettik bas sanıtarlyq dárigerdiń aqparatyna sáıkes, juqtyrýdyń 130 jaǵdaıynda vırýstyń neden kelgenin anyqtaý múmkin emes bolyp otyr.

«Qazirge deıin 45 adam aýrýdan aıyǵyp ketti. Onyń 24-i Nur-Sultanda, 21-i Almatydan. Koronavırýs juqtyrýdyń 85 paıyzy – sımptomsyz ári jeńil baǵytta ekeni belgili boldy. 11,5 paıyzy aýyrlyǵy ortasha deńgeıde. 16 adam aýyr kúıde jatyr. Olar Almaty, Nur-Sultan, Shymkent qalalary men ShQO, Qaraǵandy oblysyndaǵy patsıentter», - dedi ol.