Elimizde Qorǵanys-ónerkásip keshenin damytý qory qurylmaq

ASTANA. QazAqparat – Qazaqstanda áskerı baǵyttaǵy ǵylymı-tehnıkalyq jobalarǵa qarjylyq qoldaý kórsetetin «Qorǵanys-ónerkásip keshenin damytý qory» AQ qurylýy múmkin. Bul týraly ashyq talqyǵa shyǵarylǵan Úkimet qaýlysynda kórsetilgen, dep habarlaıdy QazAqparat tilshisi.

«Memlekettiń jarǵylyq kapıtalyna júz paıyz qatysýymen «Qorǵanys-ónerkásip keshenin damytý qory» aktsıonerlik qoǵamy qurylsyn. Qoǵam qyzmetiniń negizgi máni otandyq ǵylymı-tehnıkalyq ázirlemelerdi qarjylyq qoldaý jáne qorǵanys-ónerkásip kesheni uıymdaryn jańǵyrtý bolyp belgilensin.

Jobanyń maqsaty - negizdelgen jáne ashyq baǵa belgileý protsesin qamtamasyz etý, sondaı-aq memlekettik qorǵanys tapsyrysy sheńberinde áskerı jáne qosarlanǵan maqsattaǵy taýarlarǵa, áskerı maqsattaǵy jumystar men kórsetiletin qyzmetterge baǵa belgileý protsesin reglamentteý», - delingen qaýlyda.

Aktsıonerlik qoǵamdy qurý úshin Indýstrııa jáne ınfraqurylymdyq damý mınıstrligi 2022 jylǵa arnalǵan respýblıkalyq bıýdjetten 153 mln teńgeden astam qarajat bólmek.