Elimizde kómirsýteg shıkizatyn paıdalanýǵa quqyq beretin alǵashqy aýktsıon nátıjesinde bıýdjet 61 mlrd teńgege tolyqty
Sonymen qatar, mınıstr Aqtaý mashına jasaý zaýytynda bolyp, kásiporyndardyń óndiristik qyzmetimen tanysty.
Sapar barysynda Nurlan Noǵaev pen Mańǵystaý oblysynyń ákimi Serikbaı Trýmov óńirdegi munaı-gaz jobalarynyń basshylarymen kezdesýler ótkizdi.
Mınıstr jer qoınaýyn paıdalanýshylardyń basty mindeti – jer qoınaýyna uqypty qaraý qajet ekenin atap ótti.
«Sizder aýktsıondar arqyly jer ýchaskelerin sheksiz ýaqytqa satyp almaısyzdar, belgili bir merzimge tek jer qoınaýyn paıdalaný quqyǵyn satyp alasyzdar. Ken ornynyń baılyǵy sol nemese basqa kompanııanyń ketýimen aıaqtalmaýy tıis, óndirý turǵysynan sanaly kózqaras qajet», - dep atap ótti mınıstr.
Qazaqstandaǵy munaı jáne gaz ken oryndaryn ıgerý jáne barlaý ádisterin Energetıka mınıstrliginiń janyndaǵy ortalyq komıssııa bekitedi (BIOK). 2020 jyly komıssııa quramy 22 adamnan 33 adamǵa deıin ulǵaıtyldy, komıssııa quramyna «Atameken» ulttyq kásipkerler palatasy, zańdy tulǵalar birlestikteriniń ókilderi, sondaı-aq kómirsýtekter salasynda arnaıy bilimi men tájirıbesi bar joǵary bilikti mamandar kirdi.
Budan basqa, táýelsiz sarapshylar sany 1-den 3 adamǵa deıin ósti, sonymen qatar jer qoınaýyn paıdalanýshy men táýelsiz sarapshy arasyndaǵy baılanysty boldyrmaý maqsatynda táýelsiz saraptama uıymdastyrý fýnktsııasy 2020 jyldyń 1 qańtarynan bastap «Munaı jáne gaz aqparattyq-taldaý ortalyǵy» AQ-qa júktelgen.
Bul sharalardyń barlyǵy yqtımal sybaılas jemqorlyq táýekelderin boldyrmaý jáne ken oryndaryn barlaý men ıgerý jobalaryn tańdaýdy aıqyn jáne ashyq etý maqsatynda qabyldandy.
2020 jylǵy 23 jeltoqsanda Qazaqstanda alǵash ret kómirsýtegi shıkizatyna jer qoınaýyn paıdalaný quqyǵyn berýge arnalǵan onlaın-aýktsıon ótkizildi. Bul aýktsıon bıýdjetti 61 mıllıard teńgege tolyqtyrdy.
Aýktsıon arqyly jerge menshik quqyǵy emes, jer qoınaýyn paıdalaný quqyǵy beriletinin atap ótken mańyzdy. Bul quqyq «Jer qoınaýy jáne jer qoınaýyn paıdalaný týraly» Kodekspen retteledi, ýchaskelerdegi kez kelgen tehnologııalyq protsester Energetıka mınıstrligi janyndaǵy Barlaý jáne ıgerý jónindegi ortalyq komıssııada qaralatyn bolady.
«Bıyl BIOK músheleri jaqsy jumys jasady: birqatar jobalardy qarastyrdy jáne olardyń keıbirinen bas tartyldy. Biz árqashan ınvestıtsııa tartýdyń, jańa jumys oryndarynyń ashylýyn qoldaımyz, biraq jer qoınaýyn ıgerý «menen keıin ne bolsa, ol bolsyn» qaǵıdaty boıynsha emes, utymdy jolmen júrgizilýi tıis. Jer qoınaýy Qazaqstan Respýblıkasynyń menshigi bolyp tabylady jáne kez kelgen adam oǵan uqypty qaraýy tıis», - dedi Nurlan Noǵaev.
Energetıka mınıstri men Mańǵystaý oblysynyń ákimi munaı jáne gaz ken oryndarynyń eńbek ujymdarynyń ókilderimen áńgimelesti.
«El men Úkimet basshylyǵy Sizderdiń pandemııa kezindegi jumystaryńyzdy joǵary baǵalaıdy. Álemdik baǵalardyń tómendeýine qaramastan, saladaǵy barlyq jumysshylardyń birlesken kúshimen ken oryndary avarııalyq toqtatylmaı, jumys oryndary saqtalyp qaldy. Sizderdiń árqaısylaryńyz otanymyzdyń órkendeýine úles qosyp jatyrsyzdar», - dep atap ótti Energetıka mınıstri.
