Elimizde kómir tasymaly boıynsha shtab quryldy
ASTANA. QazAqprat - 2018 jyldyń basynan beri «QTJ» UK» AQ jelileri boıynsha 65 mln tonnadan astam kómir tıelgen. Bul týraly QazAqparat «Qazaqstan temir joly» UK»AQ baspasóz qyzmetine silteme jasap habarlaıdy.
«2018 jyldyń sońyna deıin 106,5 mln tonna kómir tasymaldaý josparlanýda, sonyń ishinde tutynýshylar úshin - 71,9 mln tonna, bul 2017 jyldaǵy tasymal kóleminen 3,5%-ǵa joǵary. «QTJ» UK» AQ-da atalyp otyrǵan júk kólemin tasymaldaýǵa jyljymaly quram sany qajetti deńgeıde jetkilikti. Ár túrli jeke menshik ıelerinen 54 myńǵa jýyq ashyq vagon jumyldyryldy. Kommýnaldyq-turmystyq kómir tasymaly úshin 9 myńǵa jýyq ashyq vagon qoldanylýda», - delingen kompanııa habarlamasynda.
Sondaı-aq, atalǵan kompanııa bastamasymen kómir tasymaly kólemin jyl boıyna birkelki bólý jáne kúzgi-qysqy kezeńdegi júktemeni azaıtý maqsatynda kómir óndirýshilerdiń qatysýymen oblys ákimdikterinde otyrystar ótkizildi. Oblys ákimdikteri men kómir óndirýshiler kómir tasymaly kólemin qaıta bólý boıynsha mindettemeler aldy. Sonyń nátıjesinde kommýnaldyq-turmystyq kómir tasymalynyń kólemi 31%-ǵa artty. Sonymen qatar, kómir júgin jóneltýshilermen de otyrystar ótkizilýde.
«Kompanııada kómir tasymaly boıynsha shtab qurylyp, júk jóneltýshiler ótinimin qanaǵattandyrý, sonymen qatar vagondar aınalymyn oryndaý boıynsha táýliktik baqylaý qoıyldy. TETs jáne GRES qoımalaryndaǵy qatty otyn qory qaldyqtaryna, sondaı-aq halyqta kómirdiń bar-joqtyǵyna táýliktik monıtorıng júrgizilýde», - delingen habarlamada.
