Elimizde kólikti qaıta tirkeý qyzmeti jeńildedi

NUR-SULTAN. QazAqparat – Qazaqstanda kólikti qaıta tirkeý jumysy edáýir jeńildedi. Bul týraly Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın jelidegi paraqshasynda jazdy, dep habarlaıdy QazAqparat tilshisi.

«Men mınıstr laýazymyna kiriskennen keıin men birden arnaıy HQO-lardyń jumysymen tanysqanmyn. Sol kezdiń ózinde adamdardyń kóptiginen týyndaıtyn qarbalasty qalaı eńserýge bolatynyn oılana bastadym. Biz komandamyzben birge bul máseleni sheshýdiń birden-bir joly – qyzmetti onlaın formatqa aýystyrý ekenin birden uqtyq. Egov portalynda bul qyzmetti elektrondy formatqa qalaı iske asyrýǵa bolatynyn ózim de kórip, qasymda keńesshi otyrsa da eki saǵat ýaqytym ketip edi», - dedi mınıstr.

Baǵdat Mýsın sol sebepti Іshki ister mınıstrine bul protsesti tolyq qaıta qaraýdy usynǵanyn, ony bankterge engizý kerektigin aıtqanyn jazdy.

«Biz búgin resmı túrde avtokólikti qaıta tirkeý qyzmetin Іshki ister mınıstrimen birge Kaspi.kz mobıldi qosymshasy arqyly iske qosamyz. Endigári avtokólikti qaıta tirkeý úshin arnaıy HQO-ǵa barýdyń qajeti joq. Kaspi.kz nemese basqa da bankterdiń memlekettik qyzmetter aıdaryna kirip, avtony qaıta tirkeı berińiz. Halyq bank dál qazirgi ýaqytta osyǵan uqsas qyzmetti. atap aıtqanda nesıege satylǵan avtokólikti qaıta tirkeý qyzmeti boıynsha jumys júrgizýde», - dedi ol.