Elimizde kóktemgi egis naýqanyna 60 mlrd teńge bólindi
Atalǵan qarajat jalpy 3 mln ga egistik alqabyna dán sebýdi qamtıdy, sondaı-aq 1 500 AÓK sýbektilerin qarjylandyrý kózdeıdi.
Ajar Qajybekovanyń sózinshe, bıylǵy jyly kóktemgi egis jumystaryna beriletin paıyzdyq mólsherleme aıtarlyqtaı tómendetildi. Qazirgi tańda sharýalar tikeleı «Agrarlyq nesıe korporatsııasynan» burynǵy 5% kredıttiń ornyna 2% zaemdy ala alady. Al eger nesıe ekinshi deńgeıli bank arqyly beriletin bolsa, sońǵy qaryz alýshy úshin kredıtteý mólsherlemesi 6%-dan aspaıdy. Óıtkeni bankke qoıylǵan mólsherleme 3,7%-dan 2%-ǵa deıin qysqartyldy. Eger qarjylandyrý kredıttik seriktestik nemese mıkroqarjy uıymy arqyly júzege asyrylatyn bolsa, sońǵy qaryz alýshy úshin mólsherleme 6%-dan aspaıtyn bolady. Bul jaǵdaıda da kredıttik seriktestik pen mıkroqarjy uıymdary úshin kredıtteý mólsherlemesi 5%-dan 3 % - ǵa deıin tómendetildi.
Korporatsııadan nesıe alý úshin sharýalar turǵylyqty jerinde nemese jumys istep júrgen jerlerindegi 13 aımaqtyq fılıaldyń birine, sondaı-aq Astana qalasynda ornalasqan ortalyq keńsege kelip qujattaryn usynýy tıis.
Osy rette, memlekettik qarajattardy paıdalanýdyń tıimdiligin jáne qaıta óńdeýmen aınalysatyn kásiporyndardyń júktemeligin arttyrý maqsatynda qarjylandyrý tetikteri basyńqy baǵyttar boıynsha júzege asyrylady. Atap aıtqanda, birinshi kezekte maıly daqyldar men mal azyǵy daqyldary qarjylandyrylady.
Eske sala keteıik, Qazaqstannyń astyq óndirýshileri de bıýdjettik kredıtti ala alady. Joǵaryda aıtylǵandaı, memlekettik bıýdjetten bólingen 60 mlrd teńgeniń 22 mıllıardy 1 sáýirge deıin basymdyqqa ıe daqyldar úshin saqtalady. Qalǵan 38 mıllıard teńge ózge daqyldarǵa, sonyń ishinde bıdaıǵa da úlestiriledi. 1 sáýirden soń 22 mlrd teńge rezervten alynyp, ıgerilmegen qarjy bolsa ereksheligi men basymdyqtarǵa qaramaı barlyq daqyldarǵa berile bastaıdy.