Elimizde kóktemgi egis alańy 19 mln gektarǵa jetti
Mınıstrdiń aıtýynsha, qazirgi ýaqytta barlyq oblystar kóktemgi dala jumystaryn júrgizýge kirisken. Naqty derekter boıynsha kóktemgi egis alańynyń aýqymy 19 mln gektarǵa jetip otyr. Onyń ishinde egilgen dándi daqyldar 14,5 mln gektardy, maıly daqyldar 2,7 mln gektardy, kókónis-baqsha daqyldary men kartop 458,3 myń gektardy, azyqtyq daqyldar 4,1 mln gektardy, tehnıkalyq daqyldar (qant qyzylshasy, maqta, temeki) 144 myń gektardy quraıdy.
«Bıyl 2018 jylǵy kólemmen deńgeıles 471,4 myń tonna tyńaıtqysh shashý josparlanyp otyr. Jyl saıyn shashylatyn tyńaıtqyshtyń kólemi ulǵaıyp keledi. Qazirgi ýaqytta 267,1 myń tonna nemese málimdelgen kólemniń 57 paıyzy tıelip jóneltildi. Onyń ishinde 160,0 myń tonna nemese 60 paıyzy - otandyq óndirýshilerdiń tyńaıtqyshtary», - deıdi mınıstr AShM-da Úkimet basshysynyń qatysýymen ótken otyrysta.
Saparhan Omarhanovtyń sózine qulaq assaq, tyńaıtqyshtardyń qalǵan bóligin soltústik óńirler kóktemgi dala jumystaryn júrgizý kezinde satyp alady.
«Sizdiń 20 naýryzdaǵy keńes barysynda bergen tapsyrmańyzdyń oryndalýyn baıandaıyn. Mınıstrlik aýyl sharýashylyǵy taýaryn óndirýshilerdiń agrohımııalyq kartogrammalardy mindetti túrde qoldaný merzimin keıinge sozý týraly usynystaryn qarastyrdy. Mıneraldy tyńaıtqyshtar satyp alýdy sýbsıdııalaý kezindegi atalǵan talapty 2021 jylǵa deıin sozý týraly sheshim qabyldandy. Tıisti akt qabyldandy. Jaqyn arada kúshine enedi. Osylaısha, aýyl sharýashylyǵy taýaryn óndirýshilerdiń mıneraldy tyńaıtqyshtardy satyp alýyn tejep turǵan kedergi alyp tastaldy», - deıdi ol.