Elimizde kitaphanashy-pedagog mamandyǵy paıda bolady
«Kitaphanashylardyń jalaqysyn ósirýmen qatar atalǵan mamandyqqa jańa mazmun berý kerek dep oılaımyz. Kitaphanashy tek kitap qoryn túgendep, ony oqyrmanǵa taýyp beretin ǵana emes, jan-jaqty bolýy kerek. Mysaly, kitap izdep kelgen balalar men jastarǵa baǵyt baǵdar bere alýy tıis. Sonymen qatar IT mamandardy da kitaphana salasyna tartý mańyzdy», - dedi Májilis depýtaty Juldyz Súleımenova «AMANAT» partııasy alańynda ótken baspasóz máslıhatynda.
Halyq qalaýlysynyń aıtýynsha, otandyq kitaphana salasy memlekettik qoldaý men ilgeriletýdi qajet etedi.
«Elimizde aldaǵy ýaqytta kitaphanashy mamandyǵyna tapshylyq týyndaıtynyn eskere otyryp, biz grantty 30%-ǵa arttyrýdy suradyq. Bul másele bıylǵy oqý jylynda sheshildi. Taldaý nátıjesi kórsetkedeı, aldaǵy 3 jylda 6 200 kitaphanashy tapshy bolmaq. Kelesi másele – kitaphanashy-pedagog nemese pedagog-kitaphanashy degen mamandyq ashý. Buǵan qatysty mınıstrlikten qarastyryp jatyrmyz degen jaýap keldi», - deıdi depýtat.
Sondaı-aq brıfıngte kitaphanashy mamandyǵyna bólinetin memlekettik granttardyń tolyq ıgerilmeı qalatyny aıtyldy.
«Búginde elimizde 120 joǵary oqý orny bar. Onyń ishinde 14-i – áskerı jáne arnaıy oqý oryndary. Kitaphanashy-pedagog mamandyǵy boıynsha reestrden ótkizdik. Atalǵan jańashyldyqty bıyldan bastap júzege asyraıyn dep otarmyz. Kitaphanashy mamandyǵyna bıyl bakalavrıatqa 100 grant, al magıstratýraǵa 20 jáne doktorantýraǵa 3 grant bólindi», - dedi Ǵylym jáne joǵary bilim mınıstrligi Joǵary bilimmen keıingi bilim komıteti tóraǵasynyń orynbasary Banym Narbekova.
