Elimizde kıikterdi qorǵaıtyn keń aýqymdy aktsııa bastaldy
Aktsııa 2020 jyldyń 15 mamyryna deıin jalǵasady. Shara kıikterdiń brakonerligine, olardyń derıvattaryn, sondaı-aq faýnanyń basqa da túrlerin satýǵa jáne ótkizýge mamandanǵan uıymdasqan qylmystyq toptardyń qyzmetin anyqtaý jáne jolyn kesý jumystaryn kúsheıtý maqsatynda qolǵa alynyp otyr.
«Osy buıryqpen tabıǵatty qorǵaý aktsııasyn ótkizý barysynda quqyq qorǵaý jáne tabıǵatty qorǵaý organdarynyń ózara árekettesý boıynsha Úılestirý shtabynyń quramy, sondaı-aq birlesken is-qımyl jospary bekitildi. Birneshe mobıldi toptardan quralǵan 200 ınspektor, 6 blokpost, 64 joǵary ótimdi avtokólik, 16 KÝNG, 5 mototsıkl men pılotsyz ushý apparaty aktsııa barysynda brakonerlikke qarsy reıdtik sharalardy uıymdastyrý úshin jumyldyryldy. Atalǵan sharany «Ohotzooprom» ÓB» RMQK-nyń ınspektorlary, QR EGTRM Orman sharýashylyǵy jáne janýarlar dúnıesi komıtetiniń aýmaqtyq bólimsheleri men quqyq qorǵaý organdarynyń mamandary Aqmola, Aqtóbe, Atyraý, Jambyl, Batys Qazaqstan, Shyǵys Qazaqstan, Qaraǵandy, Qostanaı, Qyzylorda, Mańǵystaý, Pavlodar jáne Soltústik Qazaqstan oblystarynyń aýmaǵynda ótkizedi», - delingen komıtettiń habarlamasynda.
Komıtettiń habarlaýynsha, qazirgi tańda Qazaqstanda kıikterdiń popýlıatsııasynyń sany 334 400 basty quraıdy.
«Tabıǵatty qorǵaý sharalarynyń ótken jylǵy nátıjesi kórsetkendeı, kıikterdiń múıizderine zańsyz suranys azaımaı otyr. Máselen, 2020 jyldyń basynan bastap QR EGTRM Orman sharýashylyǵy jáne janýarlar dúnıesi komıtetiniń ınspektorlary kıikterdi zańsyz atýdyń 16 brakonerlik faktisin anyqtap, 381 usha men 367 kıiktiń múıizin tárkiledi. Tabıǵat resýrstaryna keltirilgen shyǵynnyń somasy 1,08 mlrd teńgeni qurady», - delingen habarlamada.
Komıtet qazir zańǵa sáıkes brakonerlikke barǵan adamdar 12 jylǵa deıin bas bostandyǵynan aıyrylatynyn eske salady.
