Elimizde kıik tóli sanaǵyna volonterler izdep jatyr

NUR-SULTAN. QazAqparat – Qazaqstannyń bıologııalyq alýantúrlilikti saqtaý qaýymdastyǵy kıik tólderiniń ǵylymı málimetterin jınaýǵa erikti túrde kómek kórsete alatyn volonterlerdi izdestirip jatyr, dep habarlaıdy QazAqparat tilshisi.

Atalǵan qaýymdastyqtyń málimetinshe , mamyrdyń 4-19 kúnderi Qostanaı men Aqtóbe oblystarynda kıiktiń Betpaqdala popýlıatsııasynyń, al mamyrdyń 5-21 kúnderi Batys Qazaqstan oblysynda Oral popýlıatsııasynyń tólderine sanaq júrgizý úshin úsh-úshten 6 volonterler kerek. Volenterler óńirlerge Nur-Sultan qalasynan shyǵady.

Volenterlerdiń negizgi mindetterine transektalarda kıiktiń jańa týǵan tólderin izdeý, salmaǵyn ólsheý, málimetterdi jazyp alý jáne qaýymdastyq mamandaryna qajetti ózge de kómek túrlerin kórsetý kiredi. Dalalyq lagerdeni jumys ýaqyty tańerteńgi 7-00-de bastalyp, keshki 17-00-ge deıin jalǵasady jáne kúnine 15 shaqyrymnan astam jol júredi.

Qaýymdastyq volonterlerdi elordadan dalalyq lagerlerge deıin kólikpen jetkizedi jáne jolda qonaq úı, tamaqtaný shyǵyndaryn kóterip, tósenishpen, uıyqtaýǵa arnalǵan matraspen qamtamasyz etedi.

Volonter bolǵysy kelgen azamattar myna siltemege ótip, ótinish toltyrýlary qaje. Laıyqty kandıdatty tańdaǵannan keıin qaýymdastyq mamandary ózderi habarlasatyn bolady.