Elimizde Kids Go Free baǵdarlamasy aıasynda 2 myń bala ushaqpen tegin saparlaıdy
«Byltyrdan beri osy baǵdarlamaǵa memlekettik qoldaý kórsetilip keledi. 2022 jyldyń qorytyndysy boıynsha 20-ǵa jýyq otandyq týrıstik operator 700 otbasyn qabyldap, olarǵa týrpaket satyp, osy oraıda Kids Go Free baǵdarlamasy aıasynda 1,5 myń bala ushaqpen tegin saparlady. Bıyl taǵy da jańa týroperatorlar qosylady dep oılaımyz. 2023 jyly 2 myń balany qamtýdy josparladyq. Eger ótinimder kóp bolsa, qosymsha qarjylandyrý máselesi pysyqtalady», - dedi «Kazakh Tourism» UK» AQ baspasóz hatshysy Ernur Kenjebekov QR Mádenıet jáne sport mınıstrliginiń áleýmettik jelisinde ótken efırde.
Óz kezeginde «Kazakh Tourism» UK» AQ Júıelik sharalardy júzege asyrý departamentiniń dırektory Tımýr Kojýbekov bul baǵdarlamaǵa týroperatorlar erikti túrde qatysatynyn aıtty.
«Bala sanyna qatysty shekteý joq. Bir balasy bar nemese 3-4 bala tárbıelep otyrǵan otbasylar da baǵdarlamadaǵy jeńildikterdi paıdalana alady», - dedi kompanııanyń departament basshysy.
Osy oraıda baǵdarlama aıasynda saparǵa shyqqysy keletin otbasylar týroperatorlarǵa barýy kerek. Bul operatorlardyń tizimin Instagram-daǵy KidsGoFree kz paraqshasynan alýǵa bolady. El ishinde resmı operatorlar arqyly týr satyp alǵan otbasylardyń balalaryna tegin avıabılet beriledi.
Budan buryn habarlanǵandaı, Mádenıet jáne sport mınıstri Ashat Oralov kem degende 2-3 myń bala bul jeńildikti paıdalanýy kerek ekenin aıtty.
