Elimizde keıbir arnaıy ekonomıkalyq aımaqtar jabylýy múmkin
ASTANA. 5 qarasha. QazAqparat - Úkimettiń búgingi otyrysynda QR Premer-Mınıstri Serik Ahmetov arnaıy ekonomıkalyq aımaqtardyń jumysyn synǵa aldy. Osy oraıda ol naqty birneshe aımaqty anyqtap, tek solardy ǵana damytýdy usyndy.
Premer-Mınıstr atap kórsetkendeı, búginde respýblıka boıynsha qurylǵan 10 arnaıy ekonomıkalyq aımaqtyń tek 2-ýi ǵana tolyqqandy iske qosyldy. «Atyraýdaǵy munaı-hımııa parki týraly aıtyp kele jatqanymyzǵa biraz boldy. Alaıda ony tosqaýylmen qorshap, tek jerdi bólýmen ǵana shekteldik. Ol áli iske qosylmaǵan. Sol sııaqty «Qorǵas» ta, 2011 jyly qurdyq, biraq áli kúnge deıin onyń tehnıkalyq-ekonomıkalyq negizdemesi joq. Qazir tek 2 aımaq qana jumys istep jatqan kórinedi. Ol - «Býrabaı» jáne «Ońtústik». Degenmen, «Ońtústiktiń» ózinde ǵımarattar bos tur. Ázirshe, qur sózden basqa eshteńe joq. Onda naqty úsh arnaıy ekonomıkalyq aımaqty tańdap alaıyq ta, solardy kótermeıinshe, basqalaryn toqtata turaıyq», - dedi S.Ahmetov.
Osy jumysqa jaýapty QR Indýstrııa jáne jańa tehnologııalar mınıstri Áset Isekeshevtiń sózine qaraǵanda, qazirgi kezde sheteldik sarapshylardyń qatysýymen árbir arnaıy ekonomıkalyq aımaqqa saraptama jasalyp jatyr. «Sondyqtan aǵymdaǵy jyly jeltoqsannyń sońyna qaraı biz atalǵan saraptamanyń qorytyndysyn shyǵaramyz. Sol kezde elimizdegi arnaıy ekonomıkalyq aımaqtardy damytý, ıa bolmasa, jabý boıynsha naqty usynys jasaıtyn bolamyz», - dep atap kórsetti mınıstr.
