Elimizde keńse qaǵazyn sheteldik kompanııalardan satyp alýǵa tyıym salynýy múmkin
Keńse qaǵazyn jetkizetin sheteldik kompanııalardy memlekettik satyp alýǵa qatysýyn shekteý ishki naryqty ımporttan qorǵaýǵa jáne otandyq taýar óndirýshilerdi qoldaýǵa múmkindik beredi.
Bul bastamany «Atameken» UKP jáne Qazaqstan qaptamashylar qaýymdastyǵy kóterdi.
«Atameken» UKP Óńdeý ónerkásibi departamentiniń basqarýshy dırektory Almat Asqardyń aıtýynsha, keıingi úsh jylda Qazaqstan jeke óndiristerdi qurý boıynsha belsendi jumys istep jatqanyna qaramastan, qazirgi kezde memlekettik jáne kvazımemlekettik sektordyń satyp alýyna sheteldik kompanııalar kóptep qatysyp jatyr.
«Osy jyldyń tórt aıy ishinde jazý, baspa nemese basqa da grafıkalyq maqsattarǵa arnalǵan qaǵaz ben kartonnyń ımporty aqshalaı mánde 2022 jyldyń analogtyq kezeńimen salystyrǵanda 51,6%-ǵa ósip, 6,3 mlrd teńge boldy. Al zattaı mánde 18,5%-ǵa ulǵaıyp, 10,9 tonna bolǵan», – dedi spıker.
Spıker qaǵazdy jetkizetin negizgi kózder iri sheteldik kompanııalardyń kóterme satýshylary men dıstrıbıýterleri ekenin aıtty. Bul kompanııalar álemdegi geosaıası ahýalǵa baılanysty Qazaqstan naryǵyna nazar aýdara bastaǵan. Qazaqstanda óndirisi joq, jabdyq pen personalǵa shyǵyn shyǵarmaı sheteldikter konkýrsta dempıng kórsetip, tómen baǵa usyna alady. Osylaısha otandyq óndirýshiler tapsyrystan, sáıkesinshe jumystan qaǵylyp otyr.
Qazir Qazaqstanda Astana, Almaty, Shymkent jáne Petropavl qalalarynda keńse qaǵazyn óndiretin kásiporyndar tirkelgen jáne belsendi jumys istep jatyr. Kásiporyndardyń jıyntyq óndiristik qýaty jylyna 23 myń tonnadan asady. Bul rette 2022 jyly satyp alýdyń jalpy kólemi shamamen 15 myń tonna boldy.
«A3 jáne A4 formatyndaǵy keńse tehnıkasy úshin qaǵaz óndirýshi otandyq kásiporynldar satyp alýdyń qajetti kólemin tolyq qamtýǵa, kerek bolsa, óndiristik qýatty arttyrýǵa daıyn. Sonymen qatar otandyq óndirýshiler bıýdjetke salyq aýdarymdaryn qamtamasyz etedi. Import azaıady. Sondaı-aq bizdiń kompanııalar daıyn ónim eksportyn jolǵa qoıýǵa daıyn», – dep atap ótti Qazaqstannyń qaptamashylar qaýymdastyǵynyń tóraǵasy Batyrbek Áýbákirov.
