Elimizde keler jylǵa azyq-túlik rezervin satyp alý bastaldy

ASTANA. QazAqparat – Premer-Mınıstrdiń orynbasary – Saýda jáne ıntegratsııa mınıstri Serik Jumanǵarın azyq-túlik baǵasyn turaqtandyrý sharalary týraly aıtty, dep habarlaıdy QazAqparat tilshisi.

«Biz qabyldaǵan byltyrǵy sharalar bıyl nátıjesin berip jatyr. Sondyqtan ol sharalardy ári qaraı jalǵastyramyz. Forvardtyq satyp alýdy arttyramyz, ıaǵnı taýar óndirýshilerden tikeleı satyp alýǵa basymdyq beriledi. Azyq-túlik ónimderin satyp alýda bastapqy baǵa turaqtylyǵyn saqtap qalý mańyzdy», - dedi Serik Jumanǵarın Úkimet úıiniń kýlýarynda jýrnalısterdiń suraǵyna jaýap bere turyp.

Onyń aıtýynsha, eldegi azyq-túlik baǵasyn turaqtandyrý máselesi boıynsha keńes ótti.

«Ótken senbide jınalys ótkizdim. Qazir biz 2024 jyldyń kóktemine azyq-túlik ónimderin satyp alýdy bastadyq. Al osy kúzge ónim satyp alýdyń máni joq. Odan bólek, kelesi jyly sáýir jáne maýsymda taǵy satyp alamyz», - deıdi ol.

Buǵan deıin Serik Jumanǵarın eldegi janar-jaǵarmaı baǵasynyń qymbattaýy azyq-túlik qunyna qalaı áser etetinin aıtqan edi.