Elimizde kedendik rásimderdi ótkizý merzimderi men tártibi ońtaılandyrylmaq
NUR-SULTAN. QazAqparat – Búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine kedendik retteý jáne kásipkerlik qyzmet máseleleri boıynsha ózgerister men tolyqtyrýlar engizý týraly» Zańy eki oqylymda qaralyp, qabyldandy, dep habarlaıdy QazAqparat tilshisi.
Bul zańǵa Parlament depýtattary bastamashy bolǵanyn atap ótken jón. Senat tóraǵasy Máýlen Áshimbaevtyń aıtýynsha, qabyldanǵan zań kedendik rásimderdi ótkizý merzimderi men tártibin ońtaılandyrýǵa, kedendik retteýdi jetildirýge jáne bıznes ahýaldy jaqsartýǵa baǵyttalǵan.
«Osy zań adamnyń qatysýyn barynsha azaıtyp, sybaılas jemqorlyq táýekelderin tómendetýge jáne qujat aınalymyn azaıtý úshin kedendik aqparattyq bazanyń qyzmeti men «Biryńǵaı tereze» júıesi jetildirýge múmkindik beredi. Sondaı-aq syrtqy ekonomıkalyq qyzmetke qatysýshylardyń ótinishterin qaraý jáne sol boıynsha sheshim qabyldaý merzimderin qysqartýǵa jaǵdaı jasaıdy. Sonymen qatar kameralyq jáne kóshpeli kedendik tekseris júrgizý rásimi qaıta qaralady. Aldaǵy ýaqytta zań kedendik retteýdi jetildirýge úlesin qosady dep senemiz», – dedi Palata Spıkeri.
Senat depýtaty Dáýren Ádilbekovtiń sózine qaraǵanda, zań jobasy osy
keden isi salasyndaǵy memlekettik qyzmetterdi elektrondyq formatqa kóshirý jáne osynyń esebinen kedendik rásimderdi ońaılatýǵa, sybaılas jemqorlyq kórinisterin barynsha azaıtýǵa baǵyttalǵan.
Atalǵan zań jobasy boıynsha Parlament depýtattary myndaı ózgerister men tolyqtyrýlarǵa bastamashylyq jasady:
- «Bir tereze» qaǵıdaty boıynsha memlekettik qyzmetter kórsetý merzimderin edáýir qysqartý;
- Syrtqy ekonomıkalyq qyzmetke qatysýshylardyń ártúrli sanattaryn elektrondyq formatqa aýdarý;
- kameraldyq kedendik tekserýdi júrgizý tártibin reglamentteý jáne onyń merzimderin 6 aıdan 2 aıǵa deıin qysqartý;
- tekseriletin tulǵanyń ornalasqan jeri boıynsha keden organynyń kóshpeli kedendik tekserýler júrgizýine shekteýler engizý;
- tóleýshilerge bereshekti óteý týraly habarlamany jiberý merzimin 15-ten 5 jumys kúnine deıin qysqartý;
- keden organdaryna úshinshi elderden ótkiziletin taýarlardy ǵana emes, Eýrazııalyq ekonomıkalyq odaq elderinen ótkiziletin taýarlardy da synyptaý boıynsha qyzmetter kórsetý bóliginde qosymsha fýnktsııalar berý.
