Elimizde kedendik deklaratsııalardyń 100 paıyzy qashyqtan tapsyrylady

NUR-SULTAN. QazAqparat – Qazaqstanda salyq deklaratsııalarynyń 99 jáne kedendik deklaratsııalardyń 100 paıyzy qashyqtan tapsyrylady. Bul týraly búgin Úkimet otyrysynda QR Qarjy mınıstri Erulan Jamaýbaev aıtty, dep habarlaıdy QazAqparat tilshisi.

«Búgingi kúni jeke jáne zańdy tulǵalarǵa 44 memlekettik qyzmet kórsetiledi, onyń ishinde 38-i - elektrondy túrde. Ótken jyly 22,3 mln memlekettik qyzmet kórsetildi, onyń 97 paıyzy - elektrondy túrde. Memlekettik kirister komıtetiniń Baılanys ortalyǵy 2020 jyly 670 myńnan astam salyq tóleýshilerdiń ótinishin óńdedi. Olardyń 91 paıyzy operatorlardyń jumysyn «óte jaqsy» dep baǵalady», - dedi Erulan Jamaýbaev.

Onyń aıtýynsha, adamdar kóbinese jergilikti salyqtardy tóleý, salyq beresheginiń somalary, eseptilikterdi toltyrý jáne taǵy basqa máseleler boıynsha júginedi.

«Engizilgen tsıfrlyq tehnologııalarǵa keletin bolsaq. 2019 jyly biz Astana-1, Elektrondyq shot-faktýralar, Táýekelderdi basqarý júıesi aqparattyq júıelerin engizdik. Búgingi kúni salyq deklaratsııalarynyń 99 jáne kedendik deklaratsııalardyń 100 paıyzy qashyqtan tapsyrylady. «Elektrondyq shot-faktýralar» júıesin engizý kontragentter arasyndaǵy mámilelerdi onlaın rejımde qadaǵalaýǵa múmkindik berdi», - dedi mınıstr.