Elimizde qazan aıyndaǵy ınflıatsııa deńgeıi 0,3 paıyzdy qurady
ASTANA. 1 qarasha. QazAqparat - Elimizde qazan aıyndaǵy ınflıatsııa deńgeıi 0,3 paıyzdy qurady. Bul rette baǵa azyq-túlik emes taýarlaryna ótken aıda 0,4%, azyq-túlik taýarlaryna jáne aqyly qyzmetterge - 0,2 %-dan ósti. Bul týraly QR Statıstıka agenttiginiń baspasóz qyzmetinen habarlandy.
Atap aıtqanda, ótken aıda respýblıka boıynsha orta eseppen baǵanyń ósýi jumyrtqaǵa 8,6%, qyzanaqqa - 6,8%, qııarǵa - 6%, shıki sútke - 3,4%, untaq jarmaǵa - 1,7%, irimshik jáne súzbege - 1,2%, tuzdalmaǵan sary maıǵa - 1,1%, jańa aýlanǵan jáne salqyndatylǵan balyqqa - 0,7%, nanǵa, suly jarmaǵa, makaron ónimderine - 0,6%-dan, toqash jáne unnan daıyndalatyn kondıter ónimderine - 0,5%-ǵa tirkelgen.
Budan bólek, baǵanyń tómendeýi kartopqa 7,4%, jańa jınalǵan kókónisterge - 4%, qaraqumyq jarmaǵa - 1,5%, jańadan jınalǵan jemisterge - 1%, kúnbaǵys maıyna - 0,7%, sókke, qantqa - 0,3%-dan belgilendi. Sonymen qatar, baǵalar qatty otynǵa 2,3%, shyny jáne qysh buıymdaryna - 0,7%, kıim jáne aıaq kıimderge - 0,4%, jýǵysh jáne tazalaǵysh quraldarǵa - 0,3%, turmystyq aspaptarǵa, farmatsevtıkalyq ónimderge - 0,2%-dan ósip, benzın 1,8%, dızel otyny - 0,5%-ǵa qymbattady.
Sonymen qatar, baǵa deńgeıi demalys, oıyn-saýyq jáne mádenıet salasyndaǵy qyzmetterge 0,7%, shashtarazdar men jeke qyzmet kórsetý oryndarynyń qyzmetterine - 0,5%, densaýlyq saqtaý, meıramhanalar men qonaq úılerdiń qyzmetterine - 0,3%-dan joǵarylady, al alys qashyqtyqqa qatynaıtyn jolaýshylardyń temir jol kólik qyzmetterine - 1,9%-ǵa tómendedi. Al turǵyn úı-kommýnaldyq qyzmetter salasynda tarıfter sýyq sýǵa 1%, kárizge - 0,9%, qoqys jınaýǵa - 0,5%, turǵyn úıdi kútip ustaýǵa - 0,2%-ǵa ósti, al elektr energııasyna - 0,2%-ǵa tómendegen.
