Elimizde qazaqtyń aqbas sıyrynyń sany qansha
ASTANA. QazAqparat - Búginde elimizde qazaqtyń aqbas sıyrynyń damýy men asyl tuqymdy kórsetkishteri tómendeý úrdisin kórsetip otyr. Bul týraly Májiliste qazaqtyń aqbas tuqymdy iri qara mal basynyń sanyn arttyrý máselesine arnalǵan otyrysta depýtat Jeksenbaı Dúısebaev málim etti, dep habarlaıdy QazAqparat.
«Jyl on eki aı jaıylymda baǵylyp, ónim berý qabiletin joǵaltpaý, jem-shópti talǵamaý, sýyq pen ystyqqa degen joǵary tózimdiligin saqtaý, aýrýlarǵa ımmýnıtetin joǵalpaý sııaqty qazaqtyń aqbas tuqymynyń ózindik erekshelikteri barshylyq. Al kútip ustaý jaǵdaılaryna talǵampaz bolyp keletin ımporttyq tuqymdarǵa qaraǵanda, jergilikti tabıǵı-ekonomıkalyq jaǵdaıǵa anaǵurlym beıimdi ekeni barshamyzǵa belgili. Degenmen de osy qasıetterine qaramastan, qazaqtyń aqbas sıyry óziniń damýyn jáne asyl tuqymdy kórsetkishterin tómendetý ústinde. Tutastaı alǵanda, aqbas tuqymdy tıimdi paıdalanyp, osy arqyly ózindik quny arzan, sapasy joǵary tabıǵı taza et ónimin óndirip, bolashaqta Qazaqstannyń brendine aınaldyrý basty baǵyttardyń biri», - dep toqtaldy depýtat.
Osy oraıda ol qazaqtyń aqbas tuqymyn damytýdyń eń basty joldaryna toqtala kele, bul turǵyda selektsııalyq tuqymdyq jumys, jem-shóp óndirisi, agrarlyq ǵylym men bilimdi damytý, sondaı-aq veterınarııaǵa nazar aýdarý qajettigin jetkizdi.
Jeksenbaı Dúısebaevtyń sózine qaraǵanda, 1970-shi jyldardyń ortasynan 1991 jyl aralyǵynda aqbas tuqymynyń sany Qazaqstan boıynsha 1 mıllıon 370 myń basqa deıin artty.
«Ókinishke qaraı, qazirgi kezde 271 myń bas qazaqtyń aqbas tuqymyna jatatyn mal qaldy. Bul óz kezeginde osyndaı baǵaly tuqymdy ósirýge aıryqsha nazar aýdarý qajettigin bildirip otyr»,-dedi depýtat.
Foto: selo-exp.com
