Elimizde Kazakhstan Student's Union stýdentter birlestigi qurylady

ATYRAÝ. QazAqparat - H.Dosmuhamedov atyndaǵy Atyraý ýnıversıtetinde Ǵylym jáne joǵary bilim mınıstrligi janyndaǵy stýdentter keńesiniń otyrysy ótti. Sharaǵa elimizdiń barlyq óńirinen 50-den astam ýnıversıtet ókilderi qatysty.

Іs-shara ýnıversıtetterdiń stýdenttik ózin-ózi basqarý kóshbasshylary, joǵary oqý oryndary basshylary jáne Ǵylym jáne joǵary bilim mınıstri Saıasat Nurbek arasynda ashyq dıalog formatynda ótti.

Belsendiler jas mamandardy jumysqa ornalastyrý, jataqhanalardaǵy oryn tapshylyǵy, jol tólemderi boıynsha esep berý sııaqty ózekti máselelerdi kóterdi.

Mınıstr stýdentterdiń suranystaryn qoldap, jol tólemderi máselesi pysyqtalyp jatqanyn atap ótti.

Jataqhanada oryn tapshylyǵy máselesin sheshý úshin iri qalalarda jańa jataqhana salý boıynsha jobalyq keńseler qurylyp jatqanyn, sondaı-aq jyl saıyn 10 000 jańa tósek-oryn engiziletinin aıtty.

Forýmnyń basty jańalyǵy - stýdentterdiń «Kazakhstan Student's Union» respýblıkalyq stýdenttik birlestigin qurý bastamasy boldy.

Bul uıym stýdentterdiń múddelerin qorǵaýmen aınalysady.

Spıkerlerdiń aıtýynsha, bolashaqta stýdenttik uıym Bolon protsesi aıasynda Eýropalyq stýdentter odaǵynyń (ESU) quramyna kirýdi josparlap otyr.

ESU maqsaty – stýdentterdiń bilim berý, áleýmettik, ekonomıkalyq jáne mádenı múddelerin eýropalyq deńgeıde barlyq tıisti organdarǵa, atap aıtqanda Eýropalyq Odaqqa, Eýropa Keńesine jáne ıÝNESKO-ǵa qatysty usyný jáne ilgeriletý.