Elimizde Qazaq ulttyq kıimi kúni aktsııasy ótýde (FOTO)
ASTANA. QazAqparat - Búgin elimizde Qazaq ulttyq kıimi kúni aktsııasy ótýde.
Áleýmettik jelilerde tap osy kúni árbir Qazaqstan azamaty qazaqtyń ulttyq kıim úlgisinen kıim kısin degen talap-tilekter jazylyp jatyr.
Máselen, Almatyda búgin Halyqaralyq "Kóshpendiler Atamurasy" qoǵamdyq qory jáne "Qýyrdaqtyń kókesi" dámhanasy, Elbasy N.Á.Nazarbaevtyń "Mádenı mura" jáne "Halyq tarıh tolqynynda" baǵdarlamalaryn júzege asyrý maqsatynda Qazaqtyń ulttyq kıimi kúnine arnalǵan keshke shaqyryp otyr.
Budan bólek, elimizdiń ózge óńirlerindegi ortalyqtarda osy tektes sharalar ótkiziletindigi týraly aqparattar taratylýda. Bul turǵyda ulttyq kıimderdiń jáne qolónershilerdiń buıymdar kórmesin uıymdastyrý qamtylǵan.
Aktsııalardy uıymdastyrýshylar ataýly kún kúndelikti qazaqtyń beshpent, qamzol, shapanyn kııýge, sondaı-aq kenjelep qalǵan otandyq jeńil ónerkásipti damytýǵa, týrızm salasyna da serpilis beretinine senimdi. Jalpy, ulttyq kıimdi jumysqa kıip kelýge, sánge aınaldyrýǵa eshkim qarsy emes. Negizinen qundylyqtarymyzdy jańǵyrtýǵa jastar da ázir.
Túrkolog ǵalym Qarjaýbaı Sartqoja ulttyq kıimdi tek mereke kúnderinde ǵana kıgen durys emestigin alǵa tartady.
«Biz negizinen eýropalyq úlgidegi kıimderdi kıip júrmiz. Kezinde bizdiń ulttyq kıimderimiz qandaı keremet edi. Qazirgi kezde dızaınerlerimiz osy kıimderdi jańǵyrtyp, shyǵaryp jatqany qýanyshty. Osy úrdisti búkil halyqtyq dárejege shyǵarýymyz qajet. Toıda nemese merekede ǵana emes, jalpy kúndelikti kıip júretindeı maqsatty qoıý kerek. Bul óz kezeginde elimizde úlken betburys bolar edi»,-deıdi ǵalym.
Esterińizge sala keteıik, bir jyl buryn tarıhshy ári jazýshy Arman Nurmaǵambetovtiń «Ulttyq kıim kúnin» atap ótý týraly bastamasyna áleýmettik jelilerde kópshilik birden qoldaý kórsetken bolatyn. Avtordyń oıynsha, jurtshylyq sol kúni jappaı qazaqtyń ulttyq kıimin kııýi kerek. Bul merekeni toılasaq, jeńil ónerkásip pen týrızm qaryshtap damıdy.
«Nege biz eýropalyq kıimdi kıip júremiz? Ózimizdiń sánimizdi baǵalamaımyz. Bir kún bolsa da jylda ulttyq kıimdi búkil el kıip shyqsa paıda kóp. Bir jaǵynan ádemi bolyp shyǵady», - dep aıtqan edi sol kezde ıdeıa avtory Arman Nurmaǵanbetov.
