Elimizde qaı óńirlerdiń joly jaqsy

ASTANA. QazAqparat - Bıyl elimizdegi 4,6 myń shaqyrymdaı jergilikti avtojol jóndeýdiń barlyq túrimen qamtylyp, onyń 2,6 myń shaqyrymynda tıisti jumystar aıaqtaldy. Osy maqsatqa 372 mlrd teńge bólingen, dep habarlaıdy QazAqparat.

Indýstrııa jáne ınfraqurylymdyq damý mınıstrliginiń málimetinshe, Qazaqstanda óńirler ishindegi jol ınfraqurylymyn damytý úshin 486 joba iske asyrylyp jatyr. Onyń ishinde 391 joba boıynsha kúrdeli jáne ortasha jóndeý jumystary qolǵa alynsa, jańǵyrtý men tutastaı qurylysqa baılanysty 95 joba júzege asyrylyp keledi. Osy jyldyń aıaǵyna deıin avtomobıl joldaryn jóndeýge baılanysty 164 jobany, sondaı-aq joldy salyp, jańǵyrtý boıynsha 6 jobany sońyna deıin jetkizý mejelenip otyr.

«Soltústik Qazaqstan oblysyndaǵy Lavrovka – Chkalovo avtomobıl jolynyń 160-168 shaqyrymdaı aralyǵyn jańǵyrtý men Qyzylorda oblysyndaǵy Áıteke bı – Basyqara aýdandyq mańyzdaǵy kólik jolyndaǵy kópirdi jóndeýge baılanysty jumystar aıaqtalýǵa jaqyn. Sondaı-aq Shymkenttegi shyǵys aınalma jolynda júrgizilip jatqan qurylystyń 1 kezeńi támamdalyp qaldy», ­dedi IIDM Avtomobıl joldary komıtetiniń ókilderi.

Budan bólek bıyl Almatydaǵy Abaı dańǵylynyń jalǵasyn abattandyrý boıynsha da jumystar sońyna deıin jetkizilmek. Bul rette atalǵan dańǵyl Memleket basshysynyń tapsyrmasyna sáıkes iske asyrylyp jatqan Úlken Almaty aınalma avtomobıl jolynyń 6 radıaldy tarmaǵynyń biri sanalatynyn aıta ketken oryndy. Júrgizilgen jumystardyń qorytyndysy boıynsha elimizdegi jergilikti joldar jelisiniń normatıvtik jaǵdaıy jyl sońyna deıin 85%-ǵa jetkiziledi dep kózdelip otyr. Osy oraıda óńirlerge de baılanysty aldyn ala qorytyndylar shyǵarylypty.

«Aldyn ala jasalǵan qorytyndyǵa súıensek, jergilikti joldardyń jaǵdaıy Mańǵystaý (95%), Jambyl (95%) jáne Almaty (91%) oblystarynda jaqsy. Al sapasy kóńil kónshitpeıtindeı joldar Batys Qazaqstan (39%), Aqtóbe (66%) jáne Atyraý (70%) oblystaryna tıesili», dep naqtylady Avtomobıl joldary komıtetiniń ókilderi.

Foto: gov.kz