Elimizde qaı eldiń azamattary ákimshilik jaýapkershilikke jıi tartylady
NUR-SULTAN. QazAqparat – Qazaqstanda ákimshilik jaýapkershilikke kóbinese TMD elderiniń azamattary tartylatyndyǵy belgili boldy. Bul týraly QR Parlamenti Májilisiniń depýtaty Erlan Smaılov málim etti, dep habarlaıdy QazAqparat tilshisi.
«Ulttyq qaýipsizdik komıtetiniń «Búrkit» biryńǵaı aqparattyq júıesindegi málimetke sáıkes Qazaqstanǵa sońǵy 5 jyl ishinde 20 mln 877 myń shetel azamaty kelgen. Onyń 93 paıyzy TMD elderiniń azamattary. Sondaı-aq, 5 jyl ishinde 400 myńǵa jýyq (395 755) shetel azamaty ákimshilik jaýapkershilikke tartyldy. Olardyń 95 paıyzy TMD elderiniń azamattary», - dedi E. Smaılov Májilistiń zańnama jáne sot-quqyqtyq reforma komıtetiniń otyrysynda jasaǵan baıandamasynda.
Sondaı-aq, depýtat atalǵan ýaqyt ishinde shetel azamattarynyń qatysýymen elimizde 10 974 qylmystyq quqyq buzýshylyq tirkelgenin alǵa tartty.
«Onyń ishinde 3,8 myńy múlik qylmysy, ıaǵnı urlyq pen qaraqshylyq. 414 - adamǵa qarsy qylmys. Naqtyraq aıtqanda, 165 kisi óltirý jáne 249 adam densaýlyǵyna aýyr zııan keltirý. Odan bólek, 172 shetel azamaty zorlaý faktisi boıynsha jazalandy», - deıdi ol.
Buǵan deıin Májilis depýtaty Qazaqstanda balalar tólqujatynyń qoldaný merzimin qysqartýdy usynǵan bolatyn.
Odan bólek, elimizde eresekter tólqujatynyń betteri kóbeıýi múmkindigi týraly aıtyldy.
