Elimizde «Kásiptik biliktilik týraly» zań jobasy ázirlendi

NUR-SULTAN. QazAqparat - QR Eńbek jáne halyqty áleýmettik qorǵaý mınıstrligimúddeli memlekettik organdarmen, jumyskerlerdiń, jumys berýshiler men bıznestiń ókilderimen birlesip, kásiptik biliktilik týraly qujatty jáne ilespe zań jobasyn ázirledi, dep habarlaıdy QazAqparat.

Memleket basshysy 2021 jylǵy 1 qyrkúıektegi «Halyq birligi jáne júıeli reformalar – eldiń órkendeýiniń berik negizi» atty Qazaqstan halqyna Joldaýynda koronavırýs ınfektsııasynyń taralýynan týyndaǵan dúnıejúzilik pandemııa eńbek naryǵynyń aıtarlyqtaı ózgerýine ákelgenin atap ótti. Kóptegen jańa kásipterdiń paıda bolýy, kóptegen protsesterdi avtomattandyrý jáne tsıfrlandyrý aıasynda jeke básekege qabilettilik jańa kásipterdi birneshe ret qaıta daıarlaý ári damytý arqyly qamtamasyz etilýi múmkin.

«Memleket basshysynyń tapsyrmasyn oryndaý úshin Eńbekmıni «Kásiptik biliktilik týraly» jáne «Qazaqstan Respýblıkasynyń keıbir zańnamalyq aktilerine kásiptik biliktilik máseleleri boıynsha ózgerister men tolyqtyrýlar engizý týraly» zań jobalaryn ázirledi. Olar Ulttyq biliktilik júıesinde belgili bir kásip túrin nemese eńbek qyzmetiniń túrin júzege asyrýǵa úmitker jeke tulǵanyń kásiptik biliktiligin taný tártibine baılanysty qoǵamdyq qatynastardy retteýge baǵyttalǵan», - delingen Eńbek mınıstrligi málimetinde.

Negizgi zań jobasynda kásiptik biliktilikterdi tanýdyń eki tásili kózdelgen:

- mindetti negizde – QR salalyq zańnamalyq aktilerinde belgilengen qoldanystaǵy tártip negizinde júrgiziledi;

- erikti negizde – óz betinshe jáne jumys berýshiniń joldamasy boıynsha ótinish jasaǵan, belgili bir qyzmet túrin, eńbek qyzmetin júzege asyrýǵa úmitker kandıdatty sertıfıkattaý jolymen júrgiziledi.

Sondaı-aq zań jobasynda kandıdattardyń kásiptik biliktilikterdi taný rásiminen ótý quqyqtary, kásiptik biliktilikterdi erikti negizde taný sharttary men tártibi aıqyndalady.

Budan basqa, kásiptik biliktilikterdi taný júıesine erikti negizde kirý úshin mynadaı yntalandyrý sharalary kózdelgen:

- jumys berýshiler jiberetin kandıdattarǵa Qazaqstan Respýblıkasynyń eńbek zańnamasynda belgilengen tártippen kepildikter men jeńildikter berý;

- jumys berýshiniń qyzmetin deklaratsııalaý kezinde kásiptik biliktilikterdi tanýdy esepke alý;

- halyqty jumyspen qamtý ortalyǵyna jumys izdeýshi retinde júgingen jumyssyz tulǵalarǵa bir rettik vaýcher berý. Osy vaýcherdiń negizinde jumyssyz adam respýblıkalyq bıýdjet qarajaty esebinen kásiptik biliktiligin moıyndaýdan ótedi;

- memlekettik basqarýdyń jekelegen salalarynda kásipter boıynsha kásiptik biliktilikterdi taný ortalyqtaryn qurý kezinde jekelegen shyǵystardy sýbsıdııalaý.

«Zań jobalaryn qabyldaý qyzmetkerlerge, jumyssyzdarǵa ári izdenýshilerge tez ári sapaly jumysqa ornalasýǵa jáne joǵary tabys tabýǵa múmkindik beredi. Óz kezeginde jumys berýshiler qyzmetkerlerdiń kásibı jaramdylyǵy deńgeıiniń naqty táýelsiz baǵasyn ala alady, bilikti mamandardy jaldaı alady jáne eńbek ónimdiligin arttyra alady», - dep atalyp ótken vedomstvo habarlamasynda.