Elimizde qashyp ketken jemqorlardy izdestirý tıimdiligi artty
Qylmystyq qýdalaýdan jasyrynyp júrgen azamattardy izdeý – Sybaılas jemqorlyqqa qarsy is-qımyl agenttigi jumysynyń mańyzdy baǵyty. Sybaılas jemqorlyq qylmystary fıgýranttarynyń basym bóligi ury, qaraqshy jáne t.b. sekildi qylmyskerler tobyrynan sapalyq jaǵynan erekshelenedi. Aýqymdy iskerlik baılanystar men qomaqty qarjylyq múmkindikter olarǵa «qashý josparyn» búge-shigesine deıin oılastyryp, keıin ony iske asyrýǵa múmkindik beredi.
Alaıda tájirıbeden baıqaǵanymyzdaı, bul nıettiń tabystylyǵy kóbine kúmán men qııalǵa toly. Qashqyn qylmyskerler aqshanyń jyldam azaıýymen qosa, týǵan-týystarymen sóılesýdiń tapshylyǵy men týǵan jerin saǵynýdan bastap keı jaǵdaıda ózine-ózi qol jumsaý aýrýymen ulasatyn qorqynysh sezimine deıingi moraldik-psıhologııalyq máseleler jıyntyǵyna tap bolady.
Osyǵan qaramastan, Agenttiktiń izdestirý qyzmeti jetildirýin jalǵastyrýda jáne óziniń tıimdiligin pash etýde: aǵymdaǵy jyldyń birinshi toqsanynda ǵana byltyrǵy jyldyń dál osy kezeńimen salystyrǵanda 2 ese kóp adam tabyldy.
Bul máselede qylmyskerlerdi berý týraly Qazaqstan Respýblıkasy jasasqan 82 ekijaqty kelisimder men sheteldik quqyq qorǵaý organdarymen ornyqty baılanystar mańyzdy ról atqarady.
Atap aıtqanda, taıaýda ǵana Birikken Arab Ámirlikterinen «BTA-Banktiń» laýazymdy tulǵalaryna qatysty qylmystyq is boıynsha izdeýde bolǵan Ibragımov qaıtaryldy.
Qashqyndardyń jaqyn týystarymen jáne dostarymen yntaly áńgimelesý ózin izdeýdiń birshama yqpaldy tásili retinde kórsetti. Osyndaı kezdesýler barysynda Sybaılas jemqorlyqqa qarsy qyzmettiń qyzmetkerleri adamnyń ne úshin izdeýde ekenin, onyń memleket pen qoǵamǵa qandaı shyǵyn ákelgenin, eger erkimen kelgen jaǵdaıda qandaı jaza alatynyn jáne ózge de qyzyqtyratyn máselelerdi tolyq túsindiredi.
Bıyl sendirý tásiliniń arqasynda izdeýdegilerdiń jalpy sanynyń 60% óz erkimen keldi. Máselen, ata-anasymen jáne advokatpen sóıleskennen keıin osy jyldyń 9 qańtarda Bilim jáne ǵylym vıtse-mınıstri Shaıahmetovtiń isi boıynsha 5 jyl boıy izdeýde bolǵan, Reseıde jasyrynyp júrgen Kıreev óz erkimen Agenttikke keldi. Osyndaı áńgimelesýlerden soń Túrkistan oblysyndaǵy «Qazyǵurt» keden beketinde anyqtalǵan sybaılas jemqorlyq qylmystary boıynsha izdeýdegi Kýngýratov, Jarqynbekov, Maqajanov Agenttiktiń Shymkent qalasy boıynsha departamentine keldi.
Sonymen qosa, Agenttik basqa quqyq qorǵaý organdaryna asa qaýipti qylmyskerlerdi izdestirý boıynsha belsene kómektesedi. Atap aıtqanda, prokýratýranyń qaıta tapsyrylǵan izdeestirý isi boıynsha aǵymdaǵy jyldyń aqpan aıynda Almaty qalasynda QR Ulttyq gvardııasymen birlesken operatsııa barysynda ólimge ákep soqqan aýyr dene jaraqattaryn salǵany úshin 2012 jyldan beri izdeýde bolǵan Nysambaev ustaldy.
Tıimdi izdestirý Agenttik jumysynyń basty qaǵıdasynyń biri – jazanyń bultartpastyǵyn iske asyrýdyń sheshýshi faktory ekendigin atap ótken jón.
__________________________________
