Elimizde qara metallýrgııa salasynda jáne túrli-tústi metaldar óndirisinde jaǵdaı jaqsaryp keledi - Á. Isekeshev
Bul týraly búgin Astanada ótken taý-ken metallýrgııa qyzmetkerleriniń ІІ sezinde Indýstrııa jáne saýda mınıstri Áset Isekeshev málim etti, dep habarlaıdy QazAqparat.
Onyń aıtýynsha, qara metalýrgııada ótken jyldyń qazanymen salystyrǵanda óndiristiń ósimi baıqalady. Máselen, esepti kezeńde jalpaq prokat óndirisi - 3,1 paıyzǵa (2,5 mln tonna), myrysh prokaty - 2 paıyzǵa (480,7 myń tonna) ósken. «2009 jyldyń 10 aıynyń ishinde ótken jyldyń sáıkes kezeńimen salystyrǵanda úlken dıametrli qubyrlar óndirisiniń 34,8 paıyzǵa ósimi baıqalady», dedi mınıstr.
Sonymen qatar kórsetilgen kezeńde túrli-tústi metaldar óndirisinde de óndiristiń ósimi bilinip otyr. Máselen, óńdelmegen kúmis - 3,2 paıyzǵa (554 tonna óndirilgen), affınırlengen kúmis - 5,6 paıyzǵa (550 tonna), óńdelmegen altyn - 9,8 paıyzǵa (18,6 tonna), affınırlengen altyn 33,5 paıyzǵa (8,743 tonna) ósken. «Resmı statıstıkanyń keltirilgen derekteri aǵymdaǵy jyldyń qazan aıynda ótken jyldyń qazanymen salystyrǵanda joǵaryda aıtylǵan taýarlar boıynsha jaǵdaıdyń jaqsarǵanyn kórsetedi», dedi mınıstr.
