Elimizde qańtar aıyndaǵy ınflıatsııa 1,4 paıyzdy qurady

Bul týraly QazAqparat Statıstıka agenttiginiń baspasóz qyzmetine silteme jasap habarlaıdy.

Agenttik málimetterine qaraǵanda, ótken aıda baǵa azyq-túlik taýarlaryna 1,1 paıyz, azyq-túlik emes taýarlarǵa - 0,3 paıyz, aqyly qyzmet kórsetýlerge - 2,8 paıyzǵa ósken. Atap aıtqanda, azyq-túlik taýarlary rynogynda ótken aıda baǵanyń ósýi jemis pen kókóniske 2,9 paıyz, qantqa - 1,9 paıyz, sút ónimderi men jumyrtqaǵa - 1,7 paıyz, kofe, shaı jáne kakaoǵa - 1,6 paıyz, maı jáne mal maıyna - 1,2 paıyz, et ónimderine - 1,1 paıyz boıynsha baıqalǵan. Al baǵanyń tómendeýi nan jáne jarma ónimderine 0,6 paıyzdy, al nanǵa - 0,5 paıyzdy, jarmaǵa - 0,7 paıyzdy, kúrishke - 1,4 paıyzdy, unǵa - 2,5 paıyzdy quraǵan.

Sonymen birge, baǵa deńgeıi jýý jáne tazalaý quraldaryna 0,3 paıyz, kıim men aıaq kıimge, ydysqa - 0,5 paıyz, gazetter jáne kitaptarǵa, jeke gıgıena taýarlaryna - 0,7 paıyz, farmatsevtıkalyq ónimderge 1 paıyzǵa ósti. Budan basqa benzın baǵasy 2 paıyzǵa tómendep, dızel otynyna - 0,3 paıyz, kómirge - 0,7 paıyzǵa kóterilgen.

Sondaı-aq, turǵyn úı kommýnaldyq qyzmet kórsetýler salasynda tarıftiń ósýi sýyq sýǵa 9,7 paıyz, elektr energııasyna - 9 paıyz, ortalyqtan jylytýǵa - 2,6 paıyz, ystyq sýǵa - 1,7 paıyzǵa kóterildi. Al baılanys qyzmetteri 8,3 paıyzǵa qymbattady. Jergilikti temir jol jolaýshylar kóligi qyzmetiniń quny 6,5 paıyzǵa ósken.