Elimizde qant óndirý men satýdyń jańa shemalary jasalady

NUR-SULTAN. QazAqparat - Búgin Premer-Mınıstrdiń orynbasary – saýda jáne ıntegratsııa mınıstri Serik Jumanǵarın otandyq qant zaýyttary, sala qaýymdastyqtary, saýda bırjalary ókilderimen, treıderlermen jáne konsýltanttarmen qant jáne basqa da azyq-túliktiń baǵasyn turaqtandyrý, onyń ósý qarqyny boıynsha birlesken sheshimderdi talqylaý jáne ázirleý úshin kezdesti, dep habarlaıdy QazAqparat.

Úkimet resmı saıtynyń jazýynsha, talqylanǵan basty taqyryp – baǵa turaqtandyrý jáne elde qant tapshylyǵyna jol bermeý.

Kezdesýde qazaqstandyq qant, tamaq jáne qaıta óńdeý ónerkásibi qaýymdastyǵynyń prezıdenti Aıjan Naýryzǵalıeva atap ótkendeı, negizgi eksporttaýshy elderdiń qant eksportyna qabyldaǵan shekteý sharalary ishki naryqta dúrligýge alyp keldi, biraq búgingi tańda jaǵdaı turaqtandy.

«Biz birlesip, zaýyttardy shıkizatpen, al eldi osy ónimmen turaqty baǵada qamtamasyz etý úshin qantty qarjylandyrý, qaıta óńdeýdi uıymdastyrý jáne satý shemalaryn qaıta qarap, ázirleımiz. Men muny aldaǵy kúnderi jasaýdy usynamyn», — dedi Serik Jumanǵarın.

Qant salasy boıynsha keńeske qatysýshylar bul usynysty qoldady.

Sondaı-aq bul kúni Serik Jumanǵarın negizgi tamaq ónimderi óndirisiniń basqa salalarynyń problemalary men damý múmkindikterin talqylaý úshin Et odaǵynyń, baǵbandar odaǵynyń, astyq óńdeýshiler odaqtarynyń, organıkalyq ónim óndirýshilerdiń jáne basqa da agrarlyq sarapshylardyń ókilderimen kezdesýler ótkizdi.

Qatysýshylar tarapynan kóptegen usynystar aıtyldy, óndiristiń árbir baǵytyn pysyqtaý úshin qosymsha kezdesýler ótkizý jóninde sheshim qabyldandy.

Foto: primeminister.kz