Elimizde qansha oqýshy koronavırýspen aýyrdy – mınıstr jaýaby

NUR-SULTAN. QazAqparat – Respýblıka boıynsha koronavırýspen aýyrǵandardyń ishinde oqýshylardyń úles salmaǵy 0,2% aspaıdy. Bul týraly Úkimet otyrysynda QR Densaýlyq saqtaý mınıstri Alekseı Tsoı aıtty, dep habarlaıdy QazAqparat tilshisi.

«Oflaın oqytýdy birtindep iske qosýdy eskere otyryp, biz kún saıyn mektep oqýshylary arasyndaǵy syrqattanýshylyqqa monıtorıng júrgizemiz. Mektep oqýshylary arasynda aýyrǵan jaǵdaıdy tirkeý jalǵasýda. Respýblıka boıynsha koronavırýspen aýyrǵandardyń ishinde oqýshylardyń úles salmaǵy 0,2%-dan aspaıdy. Qazirgi ýaqytta mektepterdegi karantındik sharalar aımaqtardaǵy syrqattanýshylyqty eskere otyryp jáne jeke mekteptegi jaǵdaıdy eskere otyryp qabyldanady»- deıdi QR Densaýlyq saqtaý mınıstri Alekseı Tsoı.

Onyń aıtýynsha, bilim berý mekemelerin offlaın oqýǵa daıyndaý maqsatynda karantın rejıminiń talaptaryna sáıkestigine qatysty 3266 tekserý júrgizilip, 282 mektepte (8,6%) zań buzýshylyqtar anyqtaldy. Qazirgi ýaqytta barlyq anyqtalǵan buzýshylyqtar joıyldy.

«Sonymen qatar, offlaın rejımde oqıtyn stýdentterdiń kóbeıýine baılanysty, aımaqtardyń ákimderi sanıtarlyq-epıdemıologııalyq talaptardyń saqtalýyna jáne KVI-diń aldyn alý boıynsha negizgi is-sharalardyń oryndalýyna turaqty baqylaýdy qamtamasyz etýi qajet. Mysaly, bilim berý uıymdary tańerteńgi «súzgiden» ótkizý, qyzmetkerlerdiń maska rejımin saqtaýy, ylǵaldy tazalaý, dezınfektsııalaý jáne basqa sharalar atqarylýy kerek», - deıdi ol.