Elimizde qansha adam sportpen shuǵyldanady

ASTANA. QazAqparat – Búginde árbir úshinshi qazaqstandyq nemese 7 mln 587 myń adam sportpen shuǵyldanady. Bul jalpy halyq sanynyń 38,5%-y, dep habarlaıdy QazAqparat.

Mádenıet jáne sport mınıstrliginiń málimeti boıynsha, onyń ishinde 258 myńnan astam bala men jasóspirim 800-den astam dene shynyqtyrý klýbtarynda sportpen shuǵyldanady.

Sońǵy 3 jylda sportpen jáne dene shynyqtyrýmen aınalysatyn erekshe qajettilikteri bar adamdardyń sany 25,3%-ǵa ósip, 51 325 adamǵa jetti. Al 584 myńǵa jýyq adam ulttyq sport túrlerimen júıeli túrde aınalysady.

Jalpy respýblıka boıynsha 43 myńnan astam sporttyq ǵımarat bolsa, onyń 23 myńnan astamy aýyldyq jerde ornalasqan.

Bıyl 113 jańa sporttyq nysan salý, 20 sporttyq nysandy rekonstrýktsııalaý, 6 jumys istep turǵan sport obektilerin jete jaraqtandyrý boıynsha jumys bastaldy. Respýblıkada jyl saıyn 1,2 mln adamdy, onyń ishinde aýyldyq jerlerde 500 myń adamdy qamtıtyn, ártúrli deńgeıdegi 25 myńnan asa sporttyq-buqaralyq is-shara turaqty túrde ótkiziledi. Ásirese, sońǵy jyldary júgirý, marafon, velosherý men velomarafondar, sporttyq festıvalder, otbasylyq jarystar, jappaı syrǵanaý tanymal bola bastady.

Naýryz aıynda Mádenıet jáne sport mınıstrligi Dene shynyqtyrý men sportty damytýdyń 2023-2029 jyldarǵa arnalǵan tujyrymdamasyn bekitti.

Mınıstrlik 2030 jylǵa qaraı dene shynyqtyrýmen jáne sportpen júıeli túrde aınalysatyn qazaqstandyqtardyń úlesin jalpy halyq sanynyń 50%-na deıin jetkizýge nıetti. Ol úshin azamattarymyzdy sporttyq ınfraqurylymmen qamtamasyz etý baǵytynda qarqyndy jumys júredi.