Elimizde qandaı joldar jóndelip jatyr
NUR-SULTAN. QazAqparat – 2020 jyly Qazaqstan boıynsha 4 myń shaqyrymǵa jýyq jolǵa jóndeý jumystary júrip jatyr, dep habarlaıdy QazAqparat tilshisi.
«Bıyl elimiz boıynsha 4 myń shaqyrymǵa jýyq jolǵa qaıta jóndeý jumystary júrip jatyr. Onyń ishinde Taldyqorǵan men Óskemenniń arasy, Qaraǵandy, Balqash, Qapshaǵaıdan Almatyǵa shyǵatyn jol bar. Sondaı-aq, Merkiden Býrylbaıtal, Qalbataýdan Qytaı shekarasyna qaraı shyǵatyn jol, Almaty oblysy boıynsha Úsharaldan Dostyqqa deıingi jol, sol sııaqty Aqtóbe men Atyraýdyń arasy, Petropavldan Qorǵanǵa deıin, Qostanaıdan Aqtóbege deıingi joldar qaıta jóndelip jatyr. Jáne jóndelgen joldardyń sapasyn tekserip alatyn arnaıy monıtorıngtik top bar. Onyń quramynda sala mamandarynan bólek, quzyretti organ ókilderimen qatar sybaılas jemqorlyqqa qarsy kúres agenttiginiń mamandary bar. Odan bólek, joldyń sapasyn baqylaý sharalaryna kez kelgen qoǵam belsendisi de qatysa alady», - dedi QazAvtoJol ulttyq kompanııasynyń basqarma tóraǵasy Ulan Álipov.
Onyń aıtýynsha, turǵyndardan jol máselelerine qatysty suraqtar men aryz-shaǵymdar táýlik boıy qabyldanady.
«Bizde táýlik boıy jumys isteıtin 1403 jedel jeli bar. Oǵan kez kelgen adam elimizdiń barlyq óńirinen jol máselesine qatysty suraqtary men aryz-shaǵymdaryn qaldyra alady. Sondaı-aq, bizdiń kompanııanyń áleýmettik jelidegi paraqshalary arqyly da habarlasýǵa bolady. Odan bólek, QAJ.KZ degen ataýmen mobıldi qosymsha ázirlep jatyrmyz, jýyrda iske qosylady. Ol jerde jolǵa qatysty málimettermen qatar, azamattardyń óz ótinishterin qaldyrý múmkindigi bolady», - deıdi ol.
Odan bólek, basqarma tóraǵasy Prezıdenttiń bıylǵy Joldaýynda aıtylǵan eldi sapaly jolmen qamtamasyz etý tapsyrmasynyń qalaı oryndalatyny týraly aıtyp berdi.
«Elimiz boıynsha 24 myń shaqyrym jol bolsa, búginde onyń 13 myńy tolyq jóndeýden ótti. Qalǵan 11 myń shaqyrym joldy Prezıdent tapsyrmasyna sáıkes 2025 jylǵa deıin tolyq jóndep bitirý mindeti tur. Basty maqsat - 2025 jylǵa deıin joldardyń 60%-n 1-2 dáreje deńgeıine jetkizý. Al qazirgi kúni respýblıka boıynsha joldardyń 38%-y 1 jáne 2 dárejeli bolyp sanalady. Sonymen qatar, bizde 6 tranzıttik dáliz bar, búginde olardy tolyqtaı jóndep bitirý jumystary aıaqtalyp qaldy», - dedi ol.
