Elimizde qandaı kıeli oryndar bar ekenin kópshilik endi bilip jatyr - Berik Ábdiǵalıuly

NUR-SULTAN. QazAqparat - «Qasıetti Qazaqstan» ǵylymı-zertteý ortalyǵynyń jetekshisi Berik Ábdiǵalıuly tarıhı jáne kıeli oryndardaǵy ınfraqurylymdy damytý týraly oıymen bólisti, dep habarlaıdy QazAqparat tilshisi.

«Bizde qazirgi ýaqytta ásirese aımaqtarda aýqymdy jumystar tur. Nysandar qalpyna keltirilgendikten, adamdardyń olarǵa qyzyǵýshylyǵy da artyp keledi. Jalpy, bizdiń halyq ejelden-aq kıeli oryndarǵa baryp, táý etip júredi. Biraq, qazirgi ýaqytta elimizdiń túkpir-túkpirinde qandaı kıeli oryndar bar ekenin kópshilik endi ǵana bilip jatyr. Adamdardyń osy oryndarǵa degen qyzyǵýshylyǵy erekshe. Sebebi, tarıhı jáne kıeli oryndardan bólek, qanshama qoryqtarymyz bar. Ol oryndar týraly aqparattyq materıaldar men eski ańyzdar, qyzyqty rolıkter jarııalanyp jatyr. Áleýmettik jelini ashyp qalsańyz, kıeli oryndar týraly qanshama aqparat bar. Qanshama ekspedıtsııalar uıymdastyryldy. Mine, osy jumystardyń bári de kıeli qazynamyzdy halyqqa pash etti. Kıeli oryndar arqyly biz óz tarıhymyzdy tanyp jatyrmyz», - dedi Berik Ábdiǵalıuly «Rýhanı jańǵyrý» baǵdarlamasyn iske asyrý jónindegi ulttyq komıssııa otyrysynda.

Onyń aıtýyna qaraǵanda, bul baǵyttaǵy negizgi jumystar ásirese oblystarda jan-jaqty qolǵa alynǵan.

«Nur-Sultan qalasynda negizinen bizdiń sarapshylyq-ádistemelik sıpattaǵy jumystarymyz júrgiziledi. Negizgi jumystyń shoǵyry - óńirlerde. Joldar qalpyna keltirilip, nysandar jańǵyrýda. Vızıt-ortalyqtar boı kóterýde. Kásipkerlerdiń qolymen turǵyzylǵan nysandar barshylyq. Adamdar túnde qonýǵa keletin oryndar az emes. Mine, sol jerlerge qonaq úıler salynady. Osy jumystardyń bári de qaıyrymdylyq aıasynda atqarylyp jatyr. Osyndaı týrızmniń paıdasy ol. Bul shaǵyn jáne orta bıznestiń de órkendeýine jol ashady», - deıdi ol.

Berik Ábdiǵalıuly jyl sońyna deıin úsh vızıt-ortalyqtyń boı kóteretinin atap ótti.

«Bıyl «Ulytaý», «Otyrar» jáne «Tamǵaly» vızıt-ortalyqtary salynady. Osy ortalyqtardyń arqasynda týrısterdiń shoǵyry da kóbeıer degen senim bar. Buryn týrıster ol óńirlerge barǵan kezde tamaqtanyp, qona da almaıtyn. Endigi kezekte, ondaı múmkindikter ashylyp otyr. Shyntýaıtynda, bul vızıt-ortalyqtar tolyqqandy aqparattary bar shaǵyn mýzeı ispettes bolady. Bul atalǵan úsheýi - respýblıkalyq deńgeıdegi eń úlken vızıt-ortalyqtar. Oblystarda shaǵyndary da bar. Ásirese, buǵan kelgende ınfraqurylymnyń boı kóterýine erekshe úles qosyp jatqan kásipkerlerdiń jumysyna erekshe kóńil tolady», - deıdi spıker.

Eske sala ketsek, búgin Aqordada Qazaqstan Respýblıkasy Prezıdenti janyndaǵy «Rýhanı jańǵyrý» baǵdarlamasyn iske asyrý jónindegi ulttyq komıssııa otyrysy ótti.