Elimizde qalada turatyn halyqtyń sany óspek
ASTANA. QazAqparat - Aldaǵy 12 jylda Qazaqstanda áıelderdiń sany erlerge qaraǵanda basym bolady. Bul týraly Májilistegi parlamenttik tyńdaýda Jumyspen qamtý salasyndaǵy ulttyq sarapshy Jaqsybek Kúlekeev aıtty, dep habarlaıdy QazAqparat.
Onyń sózine qaraǵanda, qazirgi tańda qalada turatyn halyqtyń sany 57 paıyzdy qurasa, 2030 jyly qala halqynyń úles salmaǵy 61 paıyzǵa deıin jetedi.
Budan bólek Ulttyq sarapshy elimizdegi áıelder men erkekterdiń sanyna qatysty málimettermen bólisti.
«Jalpy elimizde áıel azamattardyń sany basym ekenin bilemiz. Qarastyryp otyrǵan merzimde de bul kórsetkish saqtalady. 2030 jyly 1000 áıelge 929 erkekten keledi. Ońtústik óńirlerde, Mańǵystaý oblysynda áıeldermenen er azamattardyń sany bir-birine jaqyn bolsa, Almaty qalasy men Reseımen shekaralas aımaqtarda bul proportsııa tómendeý bolady. Osy oraıda, 1000 áıelge shaqqanda 840-tan, al Reseımen shekaralas aımaqtarda bul kórsetkish 890 azamattyń kóleminde bolyp qalmaqshy», - dep toqtaldy J. Kúlekeev.
Sonymen qatar, ol boljam boıynsha 2030 jyly Qazaqstan halqynyń sany 20 mln 560 myńnan asýy múmkin ekenin eske saldy.
«Biraq ta halyqtyń sany odan da joǵary bolýy múmkin. Oǵan ishki ári syrtqy jaǵdaılar sebep bolady. Syrtqy jaǵdaılar toqtalsaq, ol qazir Reseıde qyzý talqyǵa túsip jatqan zeınetke shyǵý jasynyń ulǵaıtý máselesi. Eger bul máselege qatysty oń sheshimin qabyldanatyn bolsa, bizdiń elden Reseıge ketetin azamattardy birsypyra toqtatýy múmkin. Odan keıin halyqtyń ósýiniń qarqyndy bolýy elimizdegi áleýmettik-ekonomıkalyq jaǵdaıdyń qanshalyqty qarqyndy damıtynymen tyǵyz baılanysty. Eger elimizde ekonomıkanyń damý kórsetkishi 7-8 paıyz kóleminde bolsa, onda elimizdegi halyqtyń sany 2030 jylǵa qaraı 21 mıllıonǵa deıin ósýi múmkin», - dedi Jaqsybek Kúlekeev.
