Elimizde ıtbegilik óneri resmı túrde tirkeledi

BÝRABAI AÝDANY. QazAqparat - Qazaqstanda tazy men tóbetterdi saqtaý, qorǵaý jáne damytýǵa arnalǵan memlekettik baǵdarlama qabyldanyp, ıtbegilik óner resmı tanylmaq. Bul týraly QR Mádenıet jáne sport mınıstrligi, Sport jáne dene shynyqtyrý isteri komıtetiniń Ulttyq sport túrleri basqarmasynyń basshysy Meırambek Mahambetov málim etti, dep habarlaıdy QazAqparat tilshisi.

«Qazaqtyń ulttyq qundylyqtarynyń biri bolyp tabylatyn tazy men tóbetti saqtaý jáne olardy nasıhattaý maqsatynda mınıstrdiń buıryǵymen arnaıy jumys toby quryldy. Onyń quramynda osy sala mamandary, ıtbegiler jáne basqa da quzyretti organ ókilderi bar. Maqsat - tazy, tóbet federatsııasyn akkredıtatsııadan ótkizý. Sebebi búginde atbegilik pen qusbegilik óneri akkredıtatsııadan ótip, resmı túrde tanylǵan. Endigi ýaqytta ıtbegilik ónerdi resmı etip, respýblıkalyq sporttyq sharalar kúntizbesine engizbekpiz. «Qansonar» qoǵamdyq qaýymdastyǵynyń deregine súıensek, búginde elimiz boıynsha tólqujaty bar 1 500-deı tazy jáne 100-ge jýyq tóbet bar. Al resmı emes derek boıynsha Qazaqstanda 40 myńǵa jýyq tazy men tóbet bar. Onyń ishinde aralas tuqymdastar da kezdesedi», - dedi Meırambek Mahambetov.

Onyń aıtýynsha, elimizdiń barlyq óńirinde tazy men tóbet bólimshelerin ashý josparlanýda.

«Itbegilikti resmı túrde ulttyq sport túri dep tanıtyn bolsaq, demek tazy men tóbetterdi tirkep, olarǵa tólqujat berilý qajet. Ol úshin biz aldymen memlekettik baǵdarlamany bekitemiz. Ol baǵdarlamada tazy men tóbetti saqtaý, qorǵaý, damytý jáne ulttyq brend retinde nasıhattaýǵa qatystynyń barlyǵy qamtylady. Erekshe aıtyp ótetin sát, biz osy baǵdarlama aıasynda elimizde ıt tóbelesin uıymdastyrýǵa tyıym salmaqpyz», - deıdi ol.