Elimizde ІT kásiporyndardy damytý kerek- Qazaqstan ІT-kompanııalar qaýymdastyǵy
rashanyń 19-y. QazAqparat /Rýslan Ǵabbasov/ - Elimizde ІT kásiporyndardy damytýymyz kerek. Bul pikirdi búgin Astanada ótken dóńgelek ústelde «Qazaqstan ІT-kompanııalar qaýymdastyǵy» zańdy tulǵalar birlestigi (ZTB) Prezıdenti Nurlan Isın aıtty,
dep habarlaıdy QazAqparat.
Sonymen qatar shara barysynda telekommýnıkatsııalyq salalardy damytýdaǵy basym baǵyttar boıynsha master-jospar talqylandy. Bul jospardy qazirgi kezde QR Aqparattandyrý jáne baılanys agenttigi ázirlep jatyr.
Atalǵan agenttiktiń Aqparattyq tehnologııalar departamentiniń dırektory Quralaı Eleýsizovanyń aıtýynsha, qujattyń jobasynda aqparattyq kommýnıkatsııalyq tehnologııalardy jetildirý boıynsha búginde jeti basym baǵyt belgilenip otyr. Onda otandyq joǵary tehnologııalyq óndiristi jáne mıkroelektronıkany damytý, qazaqstandyq Internet jelisin jetildirý, ınfraqurylym salasyndaǵy bilim berýdi damytý sekildi máseleler qamtylǵan.
ІT saladaǵy máselelerge toqtalǵan N. Isın, «bul baǵytta biz ІT kásiporyndardy damytýymyz kerek. Sandyq ekonomıka men qoǵamnyń jaǵdaıynda eger barlyǵy shet elderden jetkizilip otyrsa, sondaı-aq bizdiń barlyq ınfraqurylymdardy sheteldik kásiporyndar basqarsa, onda qaýipsizdik túsinigi tómendep ketedi», dedi.
Onyń sózine qaraǵanda, elimizde ІT qyzmetterdi kórsetý, qoldanbaly baǵdarlamalyq qamtamasyz etýdi daıarlaý baǵyttaryn qarastyrý qajet.
