Elimizde ınvestıtsııa úshin jaǵdaı qolaıly - respýblıkalyq basylymdarǵa sholý

«Sábıdiń janaryn qaıtarýǵa járdemdessek». Osy taqyryppen «Alash aınasy» gazetinde maqala jaryq kórdi. «Redaktsııamyzǵa Shyǵys Qazaqstan oblysy Abaı aýdany Qaraýyl aýylynyń turǵyny Toǵjan Serikovadan hat kelip tústi. Hat ıesi qyzy Eldanany týysynyń 13 jasar balasy baıqaýsyzda ańshy myltyǵymen atyp jiberýiniń saldarynan qyzynyń bir jaq qol-aıaǵy durys istemeı qalǵandyǵyn, basynda 20 bytyra oq turǵandyǵyn, eki kózi birdeı kórmeı qalǵandyǵyn jetkizedi. Baspasóz  arqyly jeti jasar sábıdiń taǵdyryna arasha surap, meıirimdi, ımandy jandardan kómek qolyn sozýdy ótinedi», deıdi basylym. Atalǵan jan túrshigerlik oqıǵanyń egjeı-tegjeıin bilgińiz kelse, basylymnyń búgingi sanyn alyńyz.

Osy basylymnyń jazýynsha, Soltústik Qazaqstan oblysynyń aýyldaryna barsań beıne bir jaý áskeri júrip ótkendeı áserde qalasyń. Tóbesi ortasyna túsip, qańyrap qabyrǵalary qalǵan ǵımarattar men shuryq tesik joldar bombalanǵan soǵys dalasyn eriksiz kóz aldyńa ákeledi. Bul kórinis, ásirese, qazaǵy qalyń eldimekenderge qatysty. Sońǵy jyldary halqy kóship ketip, ıesiz qalǵan aýyldar sany artyp bara jatqany da aşy shyndyq. Bir eskererligi, ákimi ózge ult ókilinen bolyp keletin aýdandardaǵy ahýal tipti ýshyǵyp tur. Bul jaıtqa qatysty derekter tolyǵymen «Taıynshalyqtar «polıak avtonomııasy» bolýdan bas tartyp otyr» degen maqalada baıandalǵan.

«Alash aınasy» gazetiniń búgingi nómirinde «O toba, lıtsenzııamyz azaıyp barady...» degen taqyryppen maqala jarııalandy. Onda 2010 jylǵy 12-28 aqpan aralyǵynda Kanadanyń Vankýver qalasynda HHІ qysqy Olımpıada oıyndarynyń bastalýyna 84 kún qalǵandyǵyn aıta kelip, «biz keshe «osy lıtsenzııalardyń sany artqan bolar. Kóbeıse, qansha boldy eken?» degen oımen QR Ulttyq Olımpıada komıtetimen habarlasqan edik. Ókinishke qaraı, lıtsenzııalar sany artpaı, kerisinshe kemip qalǵanyn bildik. Búginde lıtsenzııalarymyzdyń sany 30 eken» delingen. Buǵan deıin QR Týrızm jáne sport mınıstri ári QR Ulttyq Olımpıada komıtetiniń prezıdenti Temirhan Dosmuhambetov Qazaqstan sportshylary 32 lıtsenzııa jeńip alǵandyǵyn aıtqan bolatyn. Atalǵan jaıttyń jaı-japsaryn, jarysqa qandaı sportshylarymyz baratyndyǵyn, áli qansha lıtsenzııa alýǵa múmkindigimiz barlyǵyn osy basylymnyń búgingi sanynan oqı alasyz.

***

Keshe qarashanyń 18-i kúni qazaq mádenıeti men óneri orny tolmas qazaǵa dýshar boldy. 78 jasyna qaraǵan shaǵynda Qazaqstannyń Halyq qaharmany Ázirbaıjan Mámbetov dúnıeden ozdy. Ol qazaq sahna ónerin álemdik deńgeıge kóterip, keńestik dáýirde-aq óziniń darynymen qazaq teatrynyń mártebesin aspandatqan, sahnalyq sheshimderiniń tereńdigimen jańashyl rejısser atanǵan óner tarlandarynyń biri bolatyn. Osyǵan oraı «Astana aqshamy» gazetiniń búgingi sanynda «Baqul bol, Áz-aǵa» degen taqyryppen maqala jaryq kórdi. Sonymen qatar basylymda Elbasynyń marqumnyń otbasy men týǵan-týystaryna kóńil aıtyp, jedel hat joldaǵany aıtylyp, Astana qalasynyń ákimi, aqyn-jazýshylar, óner qaıratkerleri gazet arqyly kórnekti óner tarlanymen baquldasty.

 Ázirbaıjan Mámbetovtiń qazasyna oraı «Vechernıaıa Astana» gazetinde de maqala jaryq kórdi.

 «Talǵam tómen, baıbalam basym». Osy taqyryppen «Astana aqshamy» gazetiniń búgingi sanynda jaryq kórgen maqalada Kereı men Jánibek handardyń músinderine qatysty júrgizilgen arnaıy saraptamanyń qorytyndysy jaıynda aıtylǵan. Jarııalanymda saraptama júrgizýge qatysqan ǵalymdardyń pikiri de qosa berilgen. Máselen, QR UǴA-nyń akademıgi Orazaq Ysmaǵululy «Kereı men Jánibek eskertkishin istegen adamdardyń nıeti durys shyǵar. Degenmen júzege asyrylý deńgeıi óte nashar. Ony dál osy qalpynda bir jerge ornatý uıatqa qaldyrady. Bizge qur aty bar, zat joq eskertkishter kerek emes», depti.

«Astana aqshamy» basylymnyń juma kúngi sanynda «Jyr degenimiz - qazaq óneriniń babasy» degen taqyryppen mańǵystaýlyq jyraý Amandyq Kómekovpen arada suhbat jarıalanǵan. «Jyraý degenimiz - burynǵy zamannyń teatry. Jyrshynyń ózi - rejısser, ózi - ártis, ózi - sheber oryndaýshy. Jyraýdyń este saqtaý qabileti, jady óte uǵymtal, zerek bolǵan. Ol - estigenderin umytpaıtyn abyz. Qazaq jyraýlary - ári aqyn, ári ánshi, ári oryndaýshy. Mine, osynyń bári qosylyp úlken jyraýlyq mekteptiń negizi qalyptasqan. Batyrlyq qolynan kelmeıtin, qorqaqtyq, sylbyrlyq ol kezdiń jyraýlaryna tán qasıet emes», deıdi A.Kómekov. mańǵystaýlyq dúldúl jyrshymen aradaǵy ekeýara áńgimeniń tolyq nusqasyn basylymnyń búgingi nómirinen oqı alasyzdar.

***

Kelesi jyly Qazaqstanda ekonomıkany ındýstrııalyq-ınnovatsııalyq jedel damytýdyń 5 jyldyq baǵdarlamasyn júzege asyrý isi bastalady. Ol  osyǵan deıin ındýstrııalyq salada qolǵa alynǵan memlekettik baǵdarlamalardyń úzdikterin óz qataryna qosyp alýǵa tıis. Osy jaıtqa oraı «Ekonomıka» gazetinde «Elimizde ınvestıtsııa úshin jaǵdaı qolaıly» degen taqyryppen maqala jaryq kórdi. Basylymnyń jazýshyna,  ındýstrıalızatsııa kartasy quramyna quny 50 mln. dollardan asatyn respýblıkalyq mańyzy bar ınvestıtsııalyq jobalar jáne quny 50 mln. dollardan tómen aımaqtyq mańyzy bar ınvestıtsııalyq jobalar enedi. Oǵan túsetin jobalar daıyndyǵy deńgeıine qaraı úsh túrge, ıaǵnı daıyndyǵy deńgeıi joǵary, ortasha nemese tómen dep bólinedi.

«Bıyl Pavlodar oblysynyń sharýalary mol astyqqqa kenelse de, ónimdi ótkizýge kelgende tyǵyryqqa tireldi. Bastapqyda tabysqa belsheden batyp, nesıe, lızıng sekildi talaı jylǵy boryshyn ótep, bir jarylqarmyz degen úmit jelge ushty. Sharýalar baıaǵydaı taqyr kúıinde qalyp otyr», dep jazady «Ekonomıka» basylymy. Atalǵan jaıtqa oraı aımaqtaǵy ahýalmen osy basylymnyń búgingi nómirinde jaryq kórgen «Mol ónimdi ótkizý muńǵa aınaldy» atty maqaladan egjeı-tegjeıli bile alasyzdar.

«Keshe Táýelsizdik saraıynda ótken Qazaqstan sýdıalarynyń 5-shi seziniń jumysyna qatysqan Memleket basshysy sóz sóıledi», dep jazady «Kazahstanskaıa pravda» gazeti. Basylymnyń jazýynsha elbasy sýdıalar qaýymdastyǵynyń aldynda ádilettilik sapasyn jaqsartýǵa qatysty birqatar mańyzdy tapsyrmalar qoıǵan. Sez jumysyna Premer-Mınıstr Kárim Másimov, Parlament Senaty men Májilisiniń spıkerleri Qasym-Jomart Toqaev pen Oral Muhamedjanov, QR Memlekettik hatshysy - Syrtqy ister mınıstri Qanat Saýdabaev, Qazaqstan, Reseı, Qyrǵyzstan, Grýzııa, Ispanııa jáne Frantsııanyń quqyq qorǵaý organdarynyń basshylary qatysqan.

Osy taqyrypty jalǵastyrǵan «Lıter» basylymy da Memleket basshysynyń sottar qataryndaǵy  kemshilikterdi jipke tizip shyqqanyn jazady. Elbasy sýdıalardy synǵa alyp qoımaı, olardy irikteý máselesine qatysty salmaqty usynystaryn da ortaǵa salyp, sýdıalyqqa úmitkerdi usynǵan adam ol úshin jaýapty bolýy tıistigin de alǵa tartty.

 Al «Ekspress-K» gazeti Almaty oblysynyń Qarasaı aýdanyndaǵy bir qonaq úıde qyzdardyń erkinen tys ustalyp, jezókshelikke májbúrlengeni anyqtalǵanyn jazady. Quqyq qorqaý organdary munda on alty qyzdy «tutqynnan» bosatqan, olardyń 11-i sheteldik, qalǵandary qazaqstandyq azamattar eken. Qazir osy qylmystyń jaı-japsary anyqtalýda, deıdi basylym.