Elimizde halyqaralyq júk tasymalyn rásimdeý jeńildeıdi

NUR-SULTAN. QazAqparat – QR Indýstrııa jáne ınfraqurylymdyq damý mınıstrligi halyqaralyq júk tasymaldaryn júzege asyratyn kólik quraldaryna ruqsat kartochkalaryn berý rásimderin jeńildetti, dep habarlaıdy QazAqparat tilshisi.

Kólik komıtetinen habarlanǵandaı, halyqaralyq avtokólik tasymaldaryn júzege asyrýǵa ruqsat berý kýáligin jáne ruqsat kartochkasyn alý úshin «Azamattarǵa arnalǵan úkimet» jáne «elektrondy úkimettiń» www.egov.kz, www.elincense.kz veb-portaly arqyly ótinim berýge bolady. Memlekettik qyzmet kórsetý merzimi – 3 jumys kúni.

«Osyǵan baılanysty tasymaldaýshylardy deldaldardyń qyzmetterin paıdalanbaýǵa jáne ruqsat kartochkalaryn, tıisinshe sheteldik ruqsat blankilerin tikeleı alýǵa shaqyramyz. Mınıstrliktiń kólik komıteti teris pıǵyldaǵy «tasymaldaýshylardyń» - deldaldardyń avtokólik týraly jalǵan málimetter bergen shemasyn anyqtady. Olar halyqaralyq júk tasymaldaýǵa arnalmaǵan kólik quralyna Memlekettik korporatsııa arqyly ruqsat kartochkalaryn alǵan. Sonyń negizinde quny 1 AEK-ti quraıtyn sheteldik ruqsat blankilerin úshinshi tulǵalarǵa satýdan keı jerlerde 100-200 AQSh dollarǵa deıin zańsyz paıda tapqan. Bul ruqsattardyń qoldan jasalǵan tapshylyǵyna jáne ártúrli alaıaqtyq áreketterdiń paıda bolýyna ákep soqtyrdy», - dedi baspasóz qyzmetinen.

Qazirgi ýaqytta komıtet halyqaralyq júk tasymaldaýǵa arnalmaǵan kólik quraldaryna ruqsatty elektrondyq túrde berý júıesinen bas tartyp, birden shuǵyl sharalar qabyldap jatyr.

«Bul másele mınıstrliktiń turaqty baqylaýynda tur. Halyqaralyq júk tasymalyn júzege asyrýǵa arnalmaǵan kólik quraldaryn anyqtaý jumystary jalǵasady», - delingen habarlamada.