Elimizde halyqaralyq júk avtotasymalynyń kólemi 6 paıyzǵa artty
QR Indýstrııa jáne ınfraqurylymdyq damý mınıstrliginiń Telegram
paraqshasynda jarııalanǵan aqparatqa qaraǵanda, esepti kezeńde júk eksporty – 4 mln tonnany, ımport – 6,8 mln tonnany qurap, 905 myń tonna tranzıttik júk tasymaldandy. 2020 jylǵy qańtar-qyrkúıek aılarynda respýblıka ishinde avtokólikpen 7,3 mlrd jolaýshy jáne 2,3 mlrd tonna júk jetkizildi.
El aýmaǵynda koronavırýstyq ınfektsııanyń taralýyna jáne pandemııanyń damýyna jol bermeý maqsatynda Úkimet qabyldaǵan karantındik sharalardan ishki jolaýshylar aınalymy eki esege azaıyp, avtomobılmen ishki júk tasymaly kólemi 8 paıyzǵa tómendedi.
QR Úkimetiniń tapsyrmasy boıynsha tótenshe jaǵdaı jáne karantın ýaqytynda QR Indýstrııa jáne ınfraqurylymdyq damý mınıstrligi mynadaı sharalar qabyldady: QHR, Reseı, Qyrǵyzstan, Ózbekstan, Tájikstan jáne Mońǵolııamen 117 turaqty avtobýs baǵyty toqtatyldy; halyqaralyq jáne tranzıttik jolaýshylar tasymalyna tyıym salynady; óńirlerge/óńirlerden jolaýshylardy oblysaralyq jáne qalaaralyq tasymaldaý toqtatyldy; óńirlerde avtovokzaldar men avtostantsııalardyń jumysy toqtatyldy; oblystardyń, Nur-sultan, Almaty jáne Shymkent qalalarynyń ákimdikterine TJ rejımi kezeńinde óńirlerde avtomobıl kóligimen jolaýshylardy tasymaldaýdy shekteý jóninde usynymdar jiberildi. Sonymen qatar Reseı jáne Ózbekstanmen memlekettik shekara arqyly ótetin 12 jeke avtomobıl ótkizý pýnkti ýaqytsha jabyldy. Shet memleketterdiń quzyretti kólik organdaryna halyqaralyq qatynasta júkterdi tasymaldaý kezinde sanıtarııalyq is-sharalardy saqtaý qajettiligi týraly usynymdar jiberildi.
