Elimizde gıpertonııanyń kóp taralýyna baılanysty arterıaldyq qysymdy júıeli túrde ólsheý qajettigi týyndap otyr - S.Dıqanbaeva
ALMATY. 16 mamyr. QazAqparat /Ádilet Musahaev/ - Almatydaǵy Salaýatty ómir saltyn qalyptastyrý problemalarynyń ulttyq ortalyǵynda Dúnıejúzilik gıpertonııamen kúres kúnine arnalǵan «Soqqyǵa jol berme: arterıaldyq gıpertonııanyń qazirgi máseleleri» taqyrybynda baspasóz máslıhaty ótti.
Bul kún 2005 jyldyń 17 mamyrynan beri Dúnıejúzilik gıpertonııamen kúres lıgasynyń bastamasymen atap ótilýde. Atalǵan ortalyqtyń dırektory Sáýle Dıqanbaevanyń aıtýynsha, Dúnıejúzilik kúndi Qazaqstanda atap ótýdegi maqsat - arterıaldyq gıpertonııa máselesine turǵyndar nazaryn aýdartý jáne elimizdegi jasy 18-den asqan ár turǵynǵa eń bolmaǵanda jylyna bir ret óziniń arterıaldyq qysymyn ólsheýdi úıretý. «Búkil álemde, onyń ishinde Qazaqstanda da gıpertonııanyń kóp taralýyna baılanysty arterıaldyq qysymdy júıeli túrde ólsheý qajettigi týyndap otyr, óıtkeni bul aýrýdyń belgileri bilinbeıdi ári adam ómirine asa qaýipti asqynýshylyqqa soqtyrýy múmkin», -deıdi S.Dıqanbaeva.
Dúnıejúzilik densaýlyq saqtaý uıymynyń usynystaryna sáıkes 120/80 mm sn.bn. shamasyndaǵy qysym qalypty bolyp tabylady. Arterıaldyq qysymnyń 140/90 mm sn.bn. deıin jáne odan da joǵary bolyp jıi kóterilýi qaýipti belgi bolyp tabylady, mundaıda dárigerge baryp tekserilgen jón eken.
«Sońǵy jyldary arterıaldyq gıpertonııamen syrqattaný deńgeıiniń toqtaýsyz joǵarylaýda ekeni baıqalady. Mysaly, Qazaqstan Respýblıkasy Statıstıka jónindegi agenttiginiń derekteri boıynsha 1998 jyly 10 myń eresek turǵynǵa shaqqanda 17,4 gıpertonııa jaǵdaıy tirkelgen, al 2010 jyly bul kórsetkish 10 myń eresek turǵynǵa shaqqanda 88,5 jaǵdaıǵa deıin ósken. Osy kezeń ishinde arterıaldyq gıpertonııanyń qan aınalysy júıesiniń qurylymyndaǵy úlestik salmaǵy 1998 jylǵy 11,6% -ten 2010 jyly 39,9% -ke deıin artqany baıqalady», -deıdi kardıologııa jáne ishki aýrýlar ǵylymı-zertteý ınstıtýtynyń bas dárigeri Symbat Abzalıeva.
Arterıaldyq gıpertonııamen syrqattanýdyń óte joǵary kórsetkishteri 2010 jyly elimizdiń Almaty, Jambyl, Atyraý qalalary men Soltústik Qazaqstan, Ońtústik Qazaqstan jáne Almaty oblystarynda baıqalǵan.
