Elimizde geolog mamandaryn ázirleýge kóńil aýdarylýy tıis - senator H. Ýálıev
ASTANA. Aqpannyń 25-i. QazAqparat /Qanat Mámetqazyuly/ - Qazaqstanda geolog mamandaryn ázirleýge kóńil aýdarylýy tıis. Búgin QR Parlamenti Senatynyń jalpy otyrysynda Úkimet basshysynyń atyna saýal joldaǵan senator Husaın Ýálıev osylaı málim etti,
dep habarlaıdy QazAqparat.
«Qazaqstan paıdaly qazbaǵa asa baı el. Elimizdiń ken oryndarynda Mendeleev kestesindegi elementterdiń barlyǵy derlik tabylyp otyr. Ondaı paıdaly qazbalardy tabý, barlaý sharalaryn júzege asyrýǵa kezinde Qazaqstannyń geologııalyq barlaý salasynyń mamandary kóp kúsh- jiger jumsaǵan edi. Alaıda, qazirgi kúni geologııalyq ǵylym jáne onyń óndiristik quramdary asa aýyr jaǵdaıdy bastan keship otyr. Bul saladaǵy mamandar tek ózderiniń yntalylyǵy arqasynda ǵana jumys istep jatyr deýge bolady», dedi senator. Onyń aıtýynsha, búgingi kúni geologııa salasyndaǵy mamandardyń ortasha jasy 60-ty quraıdy. Bunymen qoımaı, atalǵan sanattaǵylar zeınettik jasqa qatysty №2 tizimnen shyǵarylǵan. Óndiriste 80-90 paıyz qondyrǵylardyń tozyǵy jetken. «Jalpy, geolog mamandyǵynyń mańyzy joıylyp barady. Sondyqtan da, atalǵan salany qoldaý jáne damytý úshin birqatar tıimdi ári jedel sharalar qamtý qajet. Atap aıtqanda, geologııalyq kásiporyndardy olardy jańadan jaraqtandyrý úshin sýbsıdııa bólinetin memlekettik baǵdarlamalar qataryna engizilýi tıis. Sonymen birge, geolog mamandyǵyna jastardy tartý úshin arnaıy baǵdarlama ázirlense ıgi. Bul baǵytta joǵary oqý oryndarynan qosymsha granttar qarastyrylyp, onyń ishinde «Bolashaq» baǵdarlamasyna oqýshylar qamtylsa jón bolar edi. Jas mamandardyń biliktiligin arttyrý máselesi de ózekti bolyp tur», dedi senator.
