Elimizde gaz resýrstary 3.7 trln. tekshe metrdi quraıdy - N. Qapparov
ASTANA. 11 maýsym. QazAqparat - Elimizdegi gaz resýrstary 3,7 trln. tekshe metrdi quraıdy. Bul týraly búgin Parlament Májilisinde ótken Úkimet saǵatynda Qorshaǵan ortany qorǵaý mınıstri Nurlan Qapparov málim etti.
Mınıstrdiń aıtýynsha, elimizdegi gaz qorynyń basym bóligi Teńiz, Qarashyǵanaq, Qashaǵan sekildi alyp ken oryndarynda shoǵyrlanǵan. Sondyqtan da aldaǵy ýaqytta energııa qurylymdarynda gaz baǵytyn arttyrý qajet.
«Kómirge qaraǵanda, bul otyn túri kómirqyshqyl gaz shyǵarymdaryn eki esege azaıtady. Sondaı-aq, energetıka salasynda gazdy paıdalaný sýdy 4 ese az qajet etedi. Kúl-qoqys úıindilerin de quramaıdy. Odan bólek halyqaralyq baǵalaýlarǵa qaraǵanda, búgingi álem gazdyń altyn dáýirine qadam basýda. Sonymen qatar gaz stansalaryn paıdalaný barynsha tıimdi ári arzan, kómir stansalaryna qaraǵanda 3 ese jyldam salynady»,-dedi mınıstr.
