Elimizde gaz óńdeý zaýyttary salynbaq

ASTANA. QazAqparat - Ekonomıkanyń ósýin eskere otyryp, jyl saıyn taýarlyq gazdy tutynýdyń ulǵaıýy baıqalady. Atalǵan máseleni QR Premer-Mınıstriniń birinshi orynbasary Roman Sklıar kóterdi, dep habarlaıdy QazAqparat tilshisi.

«Eger 2017 jyly bul kórsetkish shamamen 14 mlrd tekshe metrdi qurasa, ótken jyldyń qorytyndysy boıynsha 19 mlrd tekshe metrdi asty. Sondyqtan gazdyń resýrstyq bazasyn ulǵaıtýmen qatar ony qaıta óńdeý qýatyn arttyrý mańyzdy. Bul úshin birqatar gaz óńdeý zaýyttarynyń qurylysy josparlanyp otyr», - dedi Roman Sklıar Energetıka mınıstrliginiń keńeıtilgen alqa otyrysynda.

Vıtse-premer atap ótkendeı, 2023 jyly aıaqtalýy tıis Qashaǵandaǵy zaýyttyń 1-shi kezeńiniń qurylysy baıaý júrip jatyr.

«2-kezeń tujyrymdamasy boıynsha áli túpkilikti sheshim qabyldanǵan joq. Sondaı-aq, Qarashyǵanaqta munaı óndirý zaýytyn salý boıynsha da sheshim joq», - deıdi R. Sklıar.

Buǵan deıin Premer-Mınıstrdiń birinshi orynbasary Energetıka mınıstri Bolat Aqsholaqovqa AES-tiń bazalyq jobasyn bıyl aıaqtaýdy tapsyrǵan edi.

Odan bólek, Roman Sklıar bıyl 1 sáýirge deıin jylý elektr ortalyqtary men jylý jelilerine aýdıt júrgizýdi aıaqtaýdy júktedi.